雅虎香港財經 太唔是何｜國王的新鈔——英國人都有鋪「炒」癮｜400歲人瑞
400歲人瑞大休一輪之後又返嚟啦！其實呢幾個月都幾忙，置業、搬屋、回港探親、第一次報稅、轉地址、結束租約、清潔舊居、外遊、接待探訪人瑞嘅香港朋友，到近日終於可以回一回氣，重新同大家分享喺倫敦生活嘅瑣碎事。
轉眼已來到夏天，原來「國王的新鈔」喺近日也開始流通！唔知大家有冇特登走去唱返張睇下呢？人瑞就無呢個閒情逸致。話說嚟咗倫敦年幾，用現金嘅次數真係五隻手指數得晒，銀包裡面仲有好多張女王頭紙幣「傍身」，仲未為自己搵到時間與理由走去唱「國王的新鈔」。不過，原來同香港人一樣，英國人都有鋪「炒銀紙」癮。新鮮熱辣嘅「國王的新鈔」，我哋一齊嚟睇下喺炒家市場會留意啲乜？
基本常識：每張鈔票都有四個位嘅前綴加埋六個位嘅序號，成為獨特嘅鈔票編號。序號從 000001 到 999000，不是000000到999999。
據《電訊報》引述紙幣專家Colin Narbeth & Son的Simon Narbeth表示，只有第一批紙幣才有價值，並且有潛力成為收藏品。
Simon話值得關注嘅編號前䮕包括：CA01嘅£5鈔票、HB01嘅£10鈔票、EH01嘅£20鈔票，以及AJ01嘅£50鈔票，但佢戴定晒頭盔表示好難講呢幾個前綴嘅鈔票可以炒到幾多錢。
Simon又話eBay嘅二手鈔票市場價格不可盡信：2016 年新版£5前綴AA01嘅鈔票，喺eBay每張售價為£800，但佢話其實佢可以用£49.5嘅價錢賣俾你。所以佢叫大家唔好咁睇唔開上eBay高價收購。
平民百姓雖然可以喺銀行唱新鈔，但原來同香港啲銀行喺農曆新年前唱新銀紙一樣，都係有限額嘅，個限額仲要苛刻過香港啲銀行，每人最多唱£300咋！
查理斯國王4月時收到每個銀碼嘅第一張新鈔，所以緊接住嘅每個銀碼第二張新鈔就成為咗最受歡迎嘅紙幣，例如新的£20編號為「EH01 000002」嘅鈔票，就係排喺送俾國王嗰張鈔票之後，但「這些機會不是我的」，下個禮拜拍賣會就會安排拍賣呢張鈔票。
拍賣行嘅業內人士就預計，最受歡迎嗰張應該可以拍賣到£10,000或以上。
除咗啲超細冧巴外，一啲具有特別主題嘅冧巴佢哋都會炒一餐，例如「000088」就非常搶手，原因咪就係華人對「8」情有獨鍾囉！
除咗「8」字，仲有「999」、「1111」呢啲重覆數字，又或者「12121」、「21212」、「444888」呢啲，都會有收藏家肯俾高價收購，得閒無聊無嘢做就睇下自己啲銀紙咩冧巴啦。
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
