雅虎香港財經 太唔是何｜搭車嘟卡扣錯錢 又要搞一爛餐 ｜400歲人瑞
倫敦交通網絡四通八達，交通工具種類又多，搭車出入除咗可以用功能猶如香港八達通卡嘅Oyster卡之外，亦可以用銀行卡，非常方便。不過，方便唔係無代價！太過依賴「方便」更有可能唔見錢！
同香港嘅鐵路站一樣，倫敦嘅鐵路站一般都係設有閘機過閘，部分鐵路站亦會好似香港輕鐵站般，無閘機，乘客需要自行於「嘟卡機」拍卡記錄入站出站。要留意嘅係，呢啲閘機並非如香港啲閘機咁「可信賴」。即係點？香港啲閘機，乘客一定要「嘟」咗先過到，但倫敦啲閘機壞機原來是等閒事，乘客即使「嘟」唔到，一樣可以過到閘。至於無閘機嘅鐵路站，「嘟卡機」即使壞咗，你走埋去「嘟」，佢都可以有「嘟」一聲，等你以為自己「嘟」咗。
言歸正傳，話說400歲人瑞用銀行卡搭車過閘或「嘟」「嘟卡機」，試過幾次扣錯錢，當然係扣多咗所以就要講出嚟啦。扣多咗可以點做呢？首先，乘客本身就要預先喺Oyster Online網站登記咗先，喺自己賬號加入自己張Oyster卡或銀行卡，咁樣做乘客先可以喺網上或手機App睇返自己嘅行程紀錄同埋扣賬紀錄。然後，透過呢啲紀錄，乘客就可以睇下佢點樣扣錯錢。例如「嘟」咗入閘，但「嘟」唔到出閘，你會覺得佢會扣你幾多錢呢？你以為閘機壞咗你都可以直接出閘好爽？少年你太天真了！喺呢個情況，鐵路公司會當乘客搭咗最貴嘅一程，所以呢種情況之下，鐵路公司扣錢就真係扣得好爽啦！
發現扣錯錢，第一時間就梗係要申訴啦！400歲人瑞發現Oyster Online網站個申訴專頁做得好好！簡單輸入資料，例如扣錯錢嗰程車嘅起點與終點、時間等等，咁就搞掂。到下一個工作日，就會有真人發電郵話跟進緊，甚至係話已經入返錢入去張銀行卡度㖭！係幾方便。不過，400歲人瑞亦試過同入面客服周旋來回電郵咗幾次，才能成功申索返正確嘅車資，例如佢話退咗款但我等極都未有要再追。而且並唔係每次佢都肯退返俾您，因為有時個紀錄真係好唔齊全。
雖然係可以申索返，但過程始終係浪費400歲人瑞所餘無幾嘅精力和時間，有見及此，400歲人瑞而家每次搭車「嘟」卡都打醒十二分精神，確定閘機有出綠燈才過閘，如果發現過閘有異常，會記低當下嘅時間，等申索時都有啲參考。
見有喺社交媒體關於英國生活群組嘅網友留言，話400歲人瑞嘅分享講嚟都嘥氣，應該等大家自己摸索喺英國嘅生活，不用事事都寫晒出嚟。咁400歲人瑞就唔係咁諗，400歲人瑞成立呢個專欄嘅目的，都係想分享自己喺英國生活嘅瑣事，等大家即使不在英國，都可以知道原來呢度係會發生啲咁嘅事，有個心理準備，又或者當趣聞睇下。見嗰位網友都加入咗嗰個「英國生活」群組，加入得嗰個群，其實都係想睇多啲人哋生活資訊分享吧！每個人對英國嘅認識程度都唔同，你以為係好普通好簡單嘅瑣事，對其他人嚟講可能好有趣好有用都未定呢⋯⋯
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
