雅虎香港財經 愛回家｜二次創作《魷魚遊戲》發放笑彈 「港版李政宰」譚俊彥驚喜客串
無綫處境劇《愛·回家之開心速遞》劇情輕鬆搞笑，一直深受觀眾歡迎，收視及口碑都好過唔少大製作劇集。劇集不時玩二次創作，重現唔少經典電影及電視場面，例如《La La Land》、《大叔的愛》、《上海灘》及《天若有情》等等。喺噚晚（14日）及今晚，劇集繼續發揮玩嘢本色，除咗將今年大熱Netflix韓劇《魷魚遊戲》改為《鹹魚遊戲》之外，仲搵咗「港版李政宰」譚俊彥驚喜客串。
噚晚劇情就講到龔燁（張景淳飾）、樹仁（單立文飾）與Peter（杜大偉飾）都有經濟拮据嘅問題，其後佢哋被邀請參加「鹹魚遊戲」，贏咗可以贏得高額獎金。三人確認參加後被帶到一個陌生環境，並穿上紫色運動套裝，仲遇到唔少同事，原來佢哋都係參賽者。喺佢哋簽下同意書後，遊戲正式開始，而第一個遊戲就係爭凳仔，結束後只剩下10位參賽者。喺佢哋進行遊戲時，有一班疑似係「Big Boss」嘅人觀看遊戲，期間仲有譚俊彥背影出現，不過佢唔係扮演參加者，而係疑似扮演幕後黑手，並話：「好彩我上次玩嘅唔係香港地道嘅遊戲，如果唔係，我一定捱唔到最後，仲要贏埋啲獎金。我真係好期待，第二個遊戲，究竟可以點玩？」。去到今晚嘅劇情將會繼續遊戲，唔知邊位會係最終贏家呢？
唔少網民睇完都留言話覺得好好笑，例如「今集好睇！好笑！456出場好驚喜！」、「今集勁好睇，超好笑，好期待下一集呀！」、「今晚好睇！連成奇勲都出埋」、「456正啊，今集超搞笑。最搞笑係片尾，成奇勳-456，真係估佢唔到哈哈」、「哈哈哈 笑死我」及「勁好笑喎，仲有譚俊彥，輕輕鬆鬆半個鐘」等等。另外。亦有網民話如果有同「木頭人」公仔撞樣嘅炎明熹客串埋一份就更加好。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
