雅虎香港財經 操盤手札記│「互換通」開通 對你有何好處？（割柑人）
美國聯儲局議息結果揭盅前夕，隔晚美股喺銀行業危機憂慮重燃，地區性銀行股遭「血洗」下，三大指數跌1.1%至1.2%；昨日港股承接外圍跌勢，裂口低開247點或1.2%，跌穿250天牛熊線（現處於19718），收報19699，跌234點或1.2%。走勢上，恒指近個半月以嚟，喺19500至20800區間上落，未有明顯方向。值得注意嘅係，昨日恒指波幅指數開出陽燭，反映投資者取態保守，為指數買定期權做保險。
美股外幣即時報價 多國新聞任睇
市場點睇美國息口走勢，睇利率互換市場交易商點押注可知梗槪。利率互換（Interest Rate Swap）又稱利率掉期，除咗反映市場對利率走勢嘅預期，亦係沽空利率風險嘅衍生工具，交易雙方立約交換相同期限、相同本金嘅利息所得，合約以唔同嘅利率指標（浮動或固定利率）作為交換標的，雖然計息方式改變，但毋須交換本金，只需就利息差額結算，即係風險只喺淨現金流量嗰部分。
打開內地利率互換市場
中國同香港亦即將有利率互換舉措，上年7月兩地監管機構公布「互換通」方案，原訂年尾落實，但疫情反覆令籌備工作拖長；上月傳出互換通終獲兩地監管機構批准，最快上半年啟動；到上周五，人行發布《內地與香港利率互換市場互聯互通合作管理暫行辦法》，適用於北向互換通，即日施行，為香港同外國投資者打開內地銀行利率互換市場，南向互換通則會另行制定。
互換通係繼滬深港通、債券通之後，中港金融市場又一互聯互通，亦係全球唯一可以畀國際投資者以自己嘅交易同結算習慣，投資內地銀行利率互換市場。隨着中國資本市場對外開放，越嚟越多境外投資者增加對國內人民幣債券嘅配置，喺互換通開通前，只能通過離岸人民幣利率互換嚟管理利率風險；互換通開通後，則多個渠道。受認可嘅境外電子交易平台，包括Tradeweb、Bloomberg。
有利外資管理利率風險
姑勿論有冇投資債券，管理利率風險都好重要，投資者如是，銀行亦如是，否則「百業之母」變「百孽之母」！上周五聯儲局就矽谷銀行（SVB）倒閉發表調查報告，「死因」之首就係——SVB高管喺管理利率風險方面犯下「教科書式」錯誤；其餘包括：承認聯儲局監管不足，未能瞭解SVB問題嚴重兼反應過慢；社交媒體迅速傳播存戶對擠提嘅擔憂，加上數碼時代提款方便加速擠提。
講開銀行，港人最有情意結嘅滙豐（005）剛於前日公布首季業績，稅前利潤按年大增2.1倍，好過預期；又恢復派發季度股息，每股0.1美元；並計劃回購最多20億美元股份。大行隨即唱好，大摩、美銀、高盛等更上調目標價。滙豐明日舉行股東周年大會，今次股東會比較特別，有兩項議案由小股東提呈表決：①分拆亞洲業務；②制定派息政策。股東會喺倫敦上午11時（香港下午6時）舉行，香港股東可以透過視像參與。呢場分拆戰點收科，密切留意吧！
割柑人
www.fb.com/hkstockpicker
本欄逢周四刊出
