爆一爆｜真逍遙富二代 笑看百億九展摸頂之作（Louise）

真逍遙富二代 笑看百億九展摸頂之作

呢幾年，香港好多富二、三代都轉趨低調，甚少蒲頭。五年前在香港地產界率先私有化的合和，其太子爺胡文新可謂「甩難」，現專注他的冰球事業。上週在九龍灣一家大酒樓，以業餘冰球會主席身份搞左個大型晚宴，席上嘅賓客並非官商巨賈，而係各區玩冰球的小朋友、家長及教練，現場氣氛十分高漲。

今時今日地產富二、三代笑唔出

胡文新跟我們一班傳媒人亦無所不談，卸下合和呢個重擔，呢位富二代在今時今日嘅香港地產界，真係笑傲江湖。香港好多地產富二、三代係地產今日嘅環境下，又要擔心息口、又要擔心賣樓、 又要擔心商鋪、寫字樓租唔租得出；精神崩緊真喺笑唔出㗎。

胡文新卸下合和呢個重擔，呢位富二代在今時今日嘅香港地產界，真係笑傲江湖。

席間又點會唔提起三年前合和「 標尾會」 摸頂賣出九龍灣展貿中心呢單又一經典交易呢？ 以100億元接貨嘅係專搞工商厦的億京及鍾楚義的資本策略（0497.HK），呢單交易都可以媲美97年林建岳的麗新（0488.HK）買起富麗華酒店以及 2017年誠哥以400億賣中環中心。

經歷風浪 薑不磨不辣

現時香港商廈供過於求，空置率有十幢IFC二期咁多，接貨嘅億京同資本策略都要變陣，申請改建為住宅。地產界中人八卦起呢單交易時都講：「你話Gordon Wu （胡應湘） 夠火喉還是億京？」正所謂薑不磨不辣，見過風浪嘅Gordon Wu，97年經歷過金融風暴嘅洗禮， 係泰國嘅高架公路投資拖累合和債台高築，都捱過一段日子。今日聽地產經紀講，為着九展呢件貨，億京都要積極賣樓套現，議價空間亦較面價有相當大折讓。

三年前合和「 標尾會」 摸頂賣出九龍灣展貿中心。 (Derek Yung via Getty Images)

呢幾年地產縮水，而合和早在2019年3月率先私有化，當時NAV（每股資產淨值）有成$68，亦因為私有化父子兩人對公司南轅北轍的睇法亦浮面，呢兩年香港地產股跌咗都起碼三、四成，如果等到而家先私有化可能仲著數，不過食幾多著幾多係整定嘅，唔通鋪鋪你贏哂咩？ 胡文新亦因為私有化而得以放生，投身自己嘅開心事業冰球，今日先至可以輕鬆自在坐低同傳媒傾下偈。