環球特工:扮疑犯!認人過程「戲子」大拆解 畀人認錯點算!
呢個職業,好多人喺睇戲時會見過,但真實上見過的話,通常就唔多係好事,就係「差館戲子」,亦即係證人要認人時,陪疑犯一齊畀人點相嘅「戲子」,假疑犯!通常睇戲就係一班人企喺單面鏡後面,證人出面指出真疑犯,但實際上又係咪咁呢?萬一「戲子」畀證人點錯相又會點呢?睇下!
入職過程:
由一個「蛇頭」負責搵人,「蛇頭」得到負責案件嘅總督察Order之後,就會去搵人,當然要跟性別,另外就係身高、年齡要夾,不過好多時候搵返嚟都會唔啱總督察心水,蛇頭會被「問候」一番,但人照用。
萬一認錯,咁…
放心,戲子萬一畀證人「點錯相」,唔會畀人拉嘅,不過之後會用兩分鐘落一個簡單口供,大約係「你畀人點錯相,案發時你去咗邊?」然後放人,唔會有事,可以放心。
最難係忍笑?
成份工基本上無技巧可言,唯一最難嘅係「忍笑」,據講好多戲子都係由於「朋友被點錯相」而忍唔住笑,而由於認人過程係要錄影作為呈堂證供,係非常嚴肅嘅事,會畀總督察鬧死。
人工?
基上戲子全部係兼職,好似做戲嘅臨記一樣收Call就出現,時薪按警署環頭而定,平均計$50,而老頭就有$80。