雅虎香港財經 突襲《聲夢傳奇》14歲姚焯菲屋企 豪宅曝光網民：果然有米女
無綫節目《聲夢傳奇》日前播出第3集，紅隊嘅14歲姚焯菲（Chantel）唱《逃生門》表現大有進步，除咗獲得李克勤讚賞之外，導師JW更感動到喊。為咗令觀眾可以更加了解參賽者，無綫就製作節目《Staries聲夢定時動態》，並安排喺J2播出。最新一集嘅主角就係Chantel，製作組就搵咗另一參賽者林君蓮（Kaitlyn）去突襲Chantel屋企，令其豪宅曝光。
林君蓮以睇風水為由突襲Chantel屋企，期間Kaitlyn需要完成「令Chantel主動要請佢喺留低過夜」嘅秘密任務。姚焯菲以素顏家居服上鏡，一入到去佢屋企，客飯廳光線十足及極具空間感，加上白色牆身及屋企非常整潔，令人感到非常舒適。另外，客廳一角擺滿家庭照，觀眾有機會睇到Chantel嘅成長過程照片。
之後，佢哋沿着走廊行入Chantel嘅睡房，整個睡房主要以少女味濃嘅粉紅色為主，無論係窗簾布、牆上蝴蝶紙條等擺設都係粉紅色。另外，Chantel直認係韓國女團BLACKPINK粉絲，所以佢睡房都有唔少BLACKPINK嘅周邊產品。
節目出街後，唔少網民都留言話Chantel屋企好大，例如：「間屋好大，睡房又好大，真係超級羨慕。」、「佢屋企好大呀」、「屋企咁大好jeng」及「果然有米女 屋企大到呢」等等。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
