笑到最後｜日本遭「旅遊復仇」的啟示（高明）

最近香港人最大投資，就係「返鄉下」，亦即去日本旅行。 (Buddhika Weerasinghe via Getty Images)

上星期本欄從正能量出發，分享港版救市措施。本周文章刊登之時，剛好是國際金融領袖投資峰會開幕日，除極少數CEO因病告假，絕大多數華爾街大班來港，亦即平日大家口中嘅國際投資者來港。香港歷來發跡，撇除制度因素，就係港人嘅銷售能力。

下載Yahoo財經APP

美股外幣即時報價 多國新聞任睇

事實上，唔通要香港人去製造晶片、搞高科技？有人才梗係做Sales。香港有資格一度成為紐倫港中嘅三大國際金融中心，其中一主因就係有大量Sales，背後亦有一條數，供呢班Sales跑數。咁啱有一班有能力挪移國際資金嘅金主或代理人嚟香港，其實亦好應該把握機會，一對一配對CEO，至少要簽張若干億嘅投資香港任何項目嘅MOU先到數。

一大班金主嚟到香港，冇理由食完飯吹完水就走人，發揮香港好Sell之都，聽講會前有晚宴酒局，一般師奶貪銀行RM杯咖啡，就簽張幾球嘅保險單；依家搭咁大個棚，開唔到單大家都好難做，華爾街CEO都係人，飲大兩杯輕鬆就自然好好Sell，情況有如澳門賭場賣酒平過出面酒吧嘅道理。相信香港人只須等會議結束後，政府同大行聯合公佈好消息便可。

美股有望重現強勢

最近香港人最大投資，就係「返鄉下」，亦即去日本旅行。旅遊業界人士估計，自當地本月初重新開放自由行旅客後，已有逾1萬名港人前往當地旅行，相對頭8個月只有5,900名港人入境日本，而且人數不繼增加。日本電視台亦做好多旅客返嚟嘅節目。

通關後旅客會返嚟，係香港好多人嘅預言、諗法，以至主觀願望，結果一批即中，但地點喺日本。日本受到全球優秀旅客追捧，因為本身基礎良好，食、買嘢、潮物、考古，以及上山下海都齊，近期大浪，莫過於日圓滙價半價。

只要齊腳，再加上大幅劈價，局勢稍為正常，啲捧場客就會返轉頭。放諸美股，全球最齊腳嘅市場，由老餅股到妖股乜都有，加上今年劈價，只要聯儲局「開關」，加息步伐正常返，美股有如日本澀谷萬聖節街頭般人頭湧湧，都只係時間問題。

高明

facebook：https://www.facebook.com/bigricetea

IG：https://www.instagram.com/koming.usstocks/

作者簡介︰賺錢係目標，炒股係手段，專欄記載由手段到目標嘅過程。

本欄逢周三刊出