雅虎香港財經 笑到最後｜機械人概念 下一個當炒浪？（高明）
隨着ChatGPT喺文書、圖像、創作等領域發展，有用過4.0嘅人都知，現時大概已經能夠理解對話，既然有呢個前提，下一個重大概念，好大機會係機械人概念，已經有能夠理解指令嘅軟件，只係爭一個可以活動嘅硬件，就成為一個工作機器。
機械人都打價格戰
撇除大型工業用嘅機械臂，最接近生物形態嘅機械人公司包括Tesla（TSLA）及Boston Dynamics，由YouTube網上比較影片，工程師一般認為Boston Dynamics機械人較Tesla Bot先進。至於最重要售價，Tesla股東大會之中，馬斯克表示一隻會賣20,000美元，相對2020年Boston Dynamics出售機械狗叫價74,500美元，狗都要超過7.4萬美元，如果第時出機械人都唔會平。打價格戰似乎Tesla佔優。
家庭及中小企 需求殷
機械人嘅需求，反而未必係大規模工業用。好多工廠依家已經冇人，例如2024年2月嘅時候，高明去過日本嘅啤酒廠同埋飲品廠參觀，大阪Asahi啤酒廠入邊，只係得幾個工人喺生產線稍為搬運貨物及工具，比較人多就係實驗室嘅一間房。另外滋賀嘅麒麟飲品廠，因為條生產線仲生產緊，所以工場入邊人多，喺度駁緊條生產線。撇除呢啲，基本上由啤酒樽以及液體進入生產線一刻，到包裝成一箱啤酒，可以係完全冇人參與。如果有機械人可以應用到，隨時小部份嘅人類都唔需要。
值得一提，參觀廠房最勞工密集就係接待我哋呢啲參觀者，五六個導遊再加幾個試飲室嘅員工，呢啲職位，就算有機械人估計都取代唔到。
所以機械人嘅應用未必係純粹工業用，畢竟工業上有生產線，本身已經全自動化，未必每一條生產線都有機械人嘅需求，而且喺工廠亦未必需要一件機器係人類嘅形態產生。
反而，一般消費者家庭以及中小企更加需要機械人。因為家庭嘅設計係畀人類使用，而一般中小企嘅生產工場，例如餐廳小店，工具擺放亦係滿足人類操控，使用人形機械取代部份員工比較合理。
如果真係20,000美元一隻，等於156,000港元，求其請一個員工一年嘅薪酬開支都唔止，如果能夠做到好簡單嘅指令，例如斬斬切切、搬上搬落、洗碗收拾等等，基本上一隻已經滿足咗好多需求。機械人嘅強項，就係做重複而沉悶嘅工作。
至於係咪就係Tesla，事實上，OpenAI大熱，受惠股竟然係Nvidia（NVDA），證明概念源頭可以唔係最當炒概念股，到升時自然知邊隻。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
