雅虎香港財經 【移民英國】英國想剪頭髮有乜選擇？£3剪髮有無伏？
移居外地除了基本衣、食、住、行，剪頭髮都係無得避難題。在英國想剪頭髮都有唔少選擇，仲平至£3有交易。
英國剪髮好貴？
唔少網上資訊都指英國剪頭髮好貴，究竟貴成點？在倫敦入Salon剪一般£30走唔甩，部分名店如香港人開設的Hands Hair Salon，剪髮人均消費就要£40。此消費水平確實令唔少亞洲留學生嗌貴，但對香港中產人士而言，三、四百港元剪個髮其實係正常消費，這班有相當實力的中產人士，移居英國繼續幫襯當地Salon就無乜心理壓力。捨得畀幾百元剪髮，除可考慮Hands Hair Salon，ikkar Hair及Ticro Hair都係評價不錯的倫敦剪髮名店。
男士們想簡單一點，則可以幫襯近年大熱的Barber Shop。一如香港的「同行」，英國Barber Shop都係以剪懷舊髮型作賣點，一般不設洗頭服務，但收費就較Salon平一截，最平£5都有交易。不過Barber Shop師傅剪髮風格係喜歡幫你兩邊鏟短，所以入到店內通常會要你揀幾多號長度，意思係電動鏟推頭的尺吋，No越細推頭就剪得越短，唔想兩邊太「青」，就要揀大No的推頭，你亦可以問問師傅的意見，他們通常都樂意按你髮型建議要用幾多號推頭。
自己剪 VS 做Model
即使捨得使錢，唔少過來人都表示遇到溝通問題，即使拎埋張相拜託洋人髮型師照住剪，可能大家對髮型審美觀唔太同，剪出來效果有時不符預期。解決此煩惱，有人會選擇到華人開設的髮型屋，貪溝通上較方便。但因為唔少社區華人主理髮型屋已經有限，有口碑就更少，故此為剪個髮可能要搭一小時車去髮型屋。
既然都麻煩，唔少人就索性選擇擔任髮型學校Model換取平價剪髮優惠。知名髮型學校如TONI & Guy、Sassoon Academy及London School of Barbering都有提供這類優惠，男士擔任Model的話，免費到£3至£6都有交易，一般都推薦付費服務，例如£3就包埋剃鬚。至於女士到Sassoon Academy一般都£13，呢個價錢可以感受名牌髮型學校服務算係抵。至於伏唔伏，付費剪有老師在旁邊睇住，通常剪出來效果都okay，而且擔任Model都係一個獨特體驗值得一試。
除了出街剪，簡單修下頭髮，唔少居英港人都會選擇自己剪。例如女士可以用小髮剪修下瀏海，男士買個電鏟，就可以自己或交由另一半修下兩邊及後邊頭髮，咁又可以拖多幾個月唔使去剪髮。特別係現在疫情期間，英國唔少髮型屋索性唔暫停營業，幫自己剪頭髮更變成生活不可少的「技能」。準備到英國居住的朋友，不妨報讀剪髮課程，幫自己添多一門生活技能吧。
【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。
伸延閱讀：
