虛擬土地REITs勢必登場?
鄭志剛宣布在The Sandbox掃入大塊虛擬土地,一石擊起千重浪,唔同年紀散戶都忽然急急研究點樣入手虛擬土地。正所謂有求就有供,主力投資虛擬土地嘅REITs會否不日登場?
美股、外匯、加密貨幣免費即時報價,自選投資組合獲取相關新聞提示
REITs提供簡單易明途徑
香港人愛磚頭,加上有知名地產商掌握住人出手投資,可以預見散戶對虛擬土地可能較加密幣更受落。不過散戶想落水,難度在於唔知點入手,亦唔知買邊塊土地先夠潛力,加上土地用途緊扣NFT數碼藝術品、舉辦虛擬社交活動,對散戶來講似乎更加抽象。
針對散戶上車「難處」,REITs正好提供一項簡單又易明途徑。雖然搞一隻主動型基金,集合散戶財力,同樣可以大炒虛擬土地,但散戶面對一個陌生市場,標榜押注具升值潛力,同時租賃收入嘅REITs,似乎更合胃口。而且香港勝在有領展,普遍散戶對REITs原理及優勢都好熟悉,自然更放心投資落進軍虛擬土地市場嘅REITs,只係到時可能要改改名,未必再係Real Estate。
聯合創辦人稱可出租
當然散戶會有個問號,虛擬土地依家有價有市,但究竟是否存在租賃市場。The Sandbox聯合創辦人兼首席運營官Sebastien Borget在訪問中曾提及,The Sandbox雖然係區塊鏈遊戲平台,但地主可以出租土地用作擺放NFT藝術品或舉辦活動賺錢,亦可以向遊客收取參觀費用,換言之虛擬土地同樣有收租概念。
既然REITs有商機,咁邊個出手搞最適合。散戶押注一個陌生市場,最講求信心,正路由遊戲平台或虛幣平台自己搞會較穩陣,不過由地產商出手搞,可能更賦予散戶信心。皆因地產商投地眼光,搞租務都駕輕就熟,由地產商牽頭,與遊戲商及虛幣商合搞REITs,講唔埋連長者散戶都湊熱鬧入表認購呢。
相關報道: