誠哥去北海道的 三大業務可能性
內地有學生團在新千歲機場巧遇誠哥仲來一張大合照,夏日炎炎誠哥山長水遠去北海道究竟仲乜?可以從誠哥生意及個人興趣估一估。
先講做生意,近年誠哥較為心煩的事情,應該就係久不久就被內地網媒指他撤資,以行動澄清最有效方法係為阿爺難題幫一把。貿易戰沒完沒了,阿爺其中一大難題係大豆及粟米貨源不足,北海道作為日本農業重鎮兼銳意拓展內地市場,安心食用保證又切合內地中產喜好,無疑是值得引入的農產品貨源。長和旗下和黃中國在內地有營運稻田及稻米貿易生意,既然有現成農產品貿易管道,由誠哥這名資深顧問出馬,向北海道生產商打聲招呼,引入大豆及粟米貨源就更事半功倍。
另一個可能係搞酒廠,誠哥早前押注分子威士忌企業Endless West,這種威士忌標榜24小時就可以釀製入樽,對傳統威士忌產業而言簡直是「黑科技」。要提升品質及縮減貨運成本,最好在亞洲有優質水源地方設廠,由買地經驗豐富到滿瀉的誠哥出馬視察,勝算當然較以三藩市為基地的Endless West老闆們大得多。
作為父親,幾時都關心仔女,所以阿仔有大項目,做父親好奇都想去睇睇。誠哥細仔除了保險王國,另一大項目係二世古的大型渡假酒店項目,以誠哥年紀,冬天雪地去睇未免太凍,夏天去視察就無咁辛苦,所以此行有可能係去望下細仔當地項目進度。
至於興趣,誠哥這類超級長者,最感興趣當然係養生。年前便有港人在沖繩那霸機場巧遇誠哥,要知道沖繩人出名長壽,睇來誠哥當時都係來一次養生之旅;或許今次都係再接再勵,享受一下北海道的天然溫泉及好山好水,況且近來香港狀況,出門走一轉總好過留在香港煩心吧。
===============
精選資訊網站「中環街市」 臉書粉絲頁