【財圈識真假】IPO造星者
各位「巴打」,「高仁指點」話你知,新股上市過程如選秀參賽者之路,背後需要有IPO造星者支持,才能成功登場。
沈繼司:近月本港IPO市場好似有復甦跡象,單計5月份就有6隻新股上市,6月份GEM板更係3年多以來再度開齋。好呀!
高 仁:係呀!新股上市除了看公司本身質素之外,呢個Big project仲需要有重要的幕後軍師,例如保薦人、律師、核數師、行業顧問等,缺一不可。
中資保薦人獨佔鰲頭
施友化:是的,而家大部分新股都係以內地公司為主,今年首5個月43家保薦人單獨或聯合為累計102家企業遞交IPO上市申請,中資券商獨佔鰲頭。遞表項目最多的保薦人前3位分別係中金、中信証券、華泰國際,保薦數目分別為36家、18家、15家。
高 仁:5月份上市新股更係悉數由中資券商包辦保薦,當中海通國際佔兩單IPO,加埋之前做咗嘅一單,佔首5個月總數量14%,躍升至保薦人排行榜第二位。中金公司則以保薦8單IPO,佔總數量38%,名列保薦人榜首。
核數師「水記」被畢馬威超越
沈繼司:外資券商大摩、高盛呢?
高 仁:哈哈!中美關係緊張,大多數內地公司都寧願政治正確,偏向選擇中資券商做保薦人,故此大摩、高盛仲係食緊白果。
施友化:除了保薦人之外,核數把關工作都非常重要,四大國際會計師事務所之中,邊間爭取到最多新股嘅Job?
沈繼司:中國恒大(03333)財務造假,前核數師「水記」羅兵咸永道被指把關不力,清盤人之前話可能要提出起訴,最近更傳出內地當局計劃判處巨額罰款,或多或少影響到其為新股核數的地位。畢馬威以6單IPO核數工作,佔總數量29%,略多於羅兵咸永道的5單或24%,近年首次超越對方成為第一位。
高 仁:各位「巴打」,新股選擇內地律師行和海外律師行嘅情況呢?
施友化:今年首5個月,10家內地律師行為21隻新股提供上市法律服務,數量最多係5隻新股嘅競天公誠,其次係各有3隻新股嘅中倫與君合;36家海外律師行亦提供了上市法律服務,數量最多係各有5隻新股嘅Maples and Calder與Conyers Dill & Pearman。
沈繼司:看新股招股書,行業概覽係其中重要一環,行業顧問或市場調查機構所做的分析,方便投資者了解行業情況及未來預測。
施友化:冇錯。基本上,Frost & Sullivan和China Insights Consultancy(灼識諮詢)是主要選擇,分別獲得12隻及7隻新股委託工作,佔比高達57%及33%。
高 仁:各位「巴打」,總括而言,一隻新股能夠成功上市,保薦人、律師、核數師、行業顧問等「IPO造星者」功勞都唔小。
本欄逢周一刊出
歡迎交流上市公司的財技個案及招數,請電郵至koyan@hkej.com。