【連續兩套都係譚俊彥】《特技人》開播 網民有咩評價？

無綫劇集《特技人》喺星期一開播，睇咗兩集後，網民嘅反應都尚算正面。

1. 題材新穎

劇集名叫《特技人》，當然係以電視/影圈內的「特技人」做背景，講出佢哋鏡頭背後嘅辛酸及默默付出。呢個題材係無綫近年少有嘅題材，唔少網民都認為題材新穎、有追看性，不過亦希望唔會有太多情情塔塔嘅場面。

2. 演員配搭新鮮

今次劇集演員班底以新鮮面孔為主，男女主角搵嚟譚俊彥及朱晨麗擔正，加上傅嘉莉及關楚耀主演。而飛車特技團隊「顛峰特技隊」嘅成員就有大師兄大志（譚俊彥飾）、May豬（朱晨麗飾）、飛邊（林師傑飾）、走蔥（羅浩銘飾）、糯米（方紹聰飾）、芝麻（溫家偉食）及丸丸（李君妍飾）。雖然睇落演員卡士比較弱，但配搭有新鮮感，唔係嚟嚟去去都係嗰幾個演員。

3. 朱晨麗搶鏡

《特技人》係朱晨麗（朱朱）入行7年以來第一部擔正嘅劇集，佢喺劇中飾演「特技人」May豬，喺頭兩集就已經要碌落樓梯、飛車及著三點式泳衣做傅嘉莉「替身」喺沙灘打排球等等，對一向飾演柔弱角色嘅朱朱真係一啲都唔錫身，為劇集搏到盡。佢嘅努力係冇白費嘅，唔少網民睇咗兩集都讚廣東話及演技都有進步。不過就有網民話佢太靚，做特技人唔夠說服力，邊有特技人會靚過演員。

喺第二集津津（傅嘉莉飾）要喺沙灘打排球拍飲品廣告，朱朱就做佢嘅「替身」，著住三點式泳衣喺沙灘做高難度動作。唔少網民都大讚佢「靚女」、「身形又好」、「睇呢套劇集都係為咗睇佢」。

4. 傅嘉莉／關楚耀大打折扣

除咗搵譚俊彥及朱晨麗做男女一之外，劇集亦搵咗傅嘉莉及第一次演出無綫劇集嘅關楚耀主演，佢哋分別飾演演員津津及導演Duncan。可能佢哋平時嘅形象麻麻，令到網民反感，唔少網民都話唔係好想見到佢哋。

5. 動作場面有誠意

一睇個劇名就知動作場面一定唔會少，喺頭兩集已經有碌樓梯、飛車及爆破嘅刺激場面，已經成功吸引觀眾眼球，誠意十足。劇集之後仲會有跳樓、空中飛人及火人等等嘅特技場面，喜歡睇刺激場面嘅朋友就唔好錯過喇！

6. 嘉慶和綿寧再做父子

譚俊彥同小演員楊凱博喺啱啱播完嘅《天命》中飾演嘉慶皇帝和太子綿寧，唔少網民都留意到佢哋穿越200年喺《特技人》中再做父子。佢哋嘅對手戲都幾有火花，默契仲好過《天命》嗰陣，唔少網民仲大讚佢哋父子間好有愛。

7. 主題曲趕客
劇集搵咗鄭俊弘唱主題曲《信念》，不過網民就唔係好buy，仲話佢唱得麻麻，不如俾關楚耀唱好過。

8. 連續兩套劇同一個男一

啱啱播完嘅《天命》由譚俊彥飾演霸氣十足嘅嘉慶皇帝，接捧嘅《特技人》都係佢擔正，雖然又古裝變時裝，但唔少網民都話太密，令人睇得太膩。譚俊彥喺前年簽約做無綫親生仔，之後套套劇都擔正，當中包括《天命》、《特技人》及未出街嘅《包青天之再起風雲》、《十八年後的殺人告白》等等。

雖然連續兩套劇集都係佢，不過唔少網民都覺得佢個樣夠正氣，好適合做「顛峰特技隊」嘅頭目，加上欣賞佢為劇集考電單車牌，更搵命博親身出現飛車衝落山嘅鏡頭，仲搞到俾玻璃割傷手掌，入咗醫院缝咗20幾針。