雅虎香港財經 
邊啲企業急需要姜濤？
姜濤似乎已成為本地廣告商重要支柱，佢厲害之處係自己拍好多廣告，一眾「姜糖」又會幫佢賣好多廣告，既係生產商又係客，咁按現時本地市場，邊啲企業急需姜濤幫手？
搵姜濤拍廣告，除了不愁人氣，另一賣點係佢可以買一送N。既可以揀與多名Mirror成員亮相，亦可以揀配搭全民造星新人，配搭之外更勝三哥米線。加上麥當勞及滙豐兩大出名打穩陣波巨企都已經搵姜濤做代言，有巨企認證，其他企業老細就可以更放心搵姜濤幫手。
美股、外匯、加密貨幣免費即時報價，自選投資組合獲取相關新聞提示
港鐵需要姜濤
以姜濤買一送N賣點，其實幾適合幫港鐵宣傳。港鐵特色係線路多，最新加入就有屯門線，以姜濤做膽，在不同線或區加上其他Mirror成員或造星新人，相信足夠覆蓋港鐵各線各站，仲可以吸引「姜濤系統」廣大fans逐站參觀，配合不同站台儲印仔之類活動，既可以推高各站人流，亦有助鼓勵市民再領略乘搭港鐵樂趣。更重要是港鐵可跟不同節日，長期聘用姜濤做代言人，既然姜濤生日都可以用來做燈箱廣告宣傳，相信母親節和兒童節都一樣可以。
國泰更需要姜濤
國泰（0293.HK）加快運經營上較港鐵更難捱，雖然有疫苗面世，但變種病毒又來襲，今年全面復飛希望越來越細。想推遠期「機票花」吸金，都不妨考慮搵姜濤夾193幫手。例如首輪推一萬張姜濤優遊票，送一堆限定姜濤出行用品，再加買票送姜濤兩場演唱會換票證，一Q清袋應無難度。反應夠爆的話，甚至每兩個月可以推一轉姜濤優遊票keep住買氣，至於點解要夾193？一來作為空少夠高，二來以其爽直個性，可順勢令國泰傳統形象更加貼地。
相關報道：
海洋公園不如推「姜濤通」
兩大主題公園同樣生意難做，就倒不如破天荒夾錢合用姜濤，順便推出「姜濤通」門票，持票可以在兩大主題公司入場玩四次。再玩大啲，可以火速在兩大主題公園各起一個姜濤館，各展示一半展品，從而鼓勵「姜糖」兩邊走盡睇展品，對提升人流都係一大助力。
假如合用姜濤代言方案行得通，既可以幫大企業在疫市慳錢，亦可以解決姜濤無期的難題。不過此例一開，我哋就更難避免面對周街姜濤的城市風景了。
（姜濤圖片來源：官網與Fansclub）
相關報道：
