金缸經｜減租幫到金舖生意？

觀塘有間好出名嘅冰室近排執笠，聽講間冰室日日好多人食，咁都要執，原來因為業主加租，8,340呎嘅舖頭月租嗌價60萬，即係呎租近72蚊。睇返啲代理網上資料，金鐘甲廈統一中心呎租普遍叫緊30幾蚊，中環中心平均叫緊60至70蚊左右，就算銅鑼灣道一個做餐飲嘅吉舖，呎租都係叫緊42蚊。嗰區係咪可以起動九龍東唔知，但至少租金叫價起動咗先。

用呢件事開頭，唔等於要推翻之前嘅觀點——香港店舖執笠潮，加租只係一部份原因，但唔係主因。不過零售管理協會主席謝太一直好積極推動業主減租，無他，成本總係慳得一蚊就多一蚊利錢。但問題係，減租係咪唯一出路？一眾本地金舖股都出咗年度業績，對比周大福、六福、周生生、英皇鐘錶珠寶、景福幾間都賺多咗錢，謝瑞麟暫時係唯一一間蝕錢，重要係按年蝕多咗超過一倍。

睇返謝瑞麟業績公告個MDNA，佢將業績差既原因分為：1) 消費者行為和購買欲受經濟影響；2) 24K金產品影響利潤率。如果話消費者購買欲低咗，至少佢全年度收入都升咗2%，另外5間，除咗景福收入跌咗13%，其他收入上升15%至31%，即係購買欲問題並不能完全解釋業績差既問題，更何況景福收入減少但純利仍有7%增長。至於24K金產品影響利潤率，算係貼近返少少公司問題。佢哋業績講24K金產品銷售組合佔比上升，導致毛利率由上年度35.1%減少到 29.6%，但呢個毛利率喺6間公司入面係第3高，純利升幅最大嘅周生生，毛利率都係26.4%。

喺P&L由頭開始睇謝瑞麟，大家唔使好叻睇數，都可以大約知點解謝瑞麟蝕多咗。收入多咗6,400萬，但銷售成本就多咗1.9億，再掃落去所有「費用」嘅項目，全部都係增加，但其他收入就減少，最主要係政府補貼少咗2,200萬，同埋投資物業公允值虧損740萬，又有一大堆減值。簡單講就係壓唔到成本，無咗啲疫情補貼，再加上地產市道不景氣，直接放大咗公司營運效率低嘅問題。

至於謝太一直好在意嘅租金，佢哋份業績公告都無太多着墨，以周大福做參考，舊年租金同折舊攤銷加埋先佔佢哋營業額比率1.2%，人工就佔4.9%，好明顯租金對行業影響並唔係真係講到咁大。反而，謝瑞麟租金收入更按年上升咗9.3%，唔知佢又有無減租既計劃？

謝瑞麟係香港本土品牌，而且佢哋嘅婚戒系列設計真心特別，唔係無得做。只係營運問題，再重新包裝公司投資故事，要時間解決，但留畀公司嘅時間多唔多呢？佢哋年報話現金及現金等價物（包括已抵押定期存款）為港幣 4.74億，而計息銀行貸款總額為港幣10.6億，其中港幣 5.69億係流動負債，而且佢哋亦違反部份銀行借貸及銀行融資借貸若干財務契諾，只係報告期結束前獲得豁免。

金缸經

註：專欄作家言論不代表本網立場

密切留意BossMind動向！立即CLS FB Instagram Youtube