雅虎香港財經 金缸經｜齋叫減租係偽命題
近期香港嘅媒體流量密碼，就係執笠，總之喺一個關注執笠群組講條街有幾靜，啲舖頭執咗幾多，就會引嚟大把engagement。結果個群組自己執埋笠（其實只係改名啫，但點解改名，個群組之後用嚟做咩，都大概估到方向）。
點應對執笠潮，無論素人定業界，各有出發點，好多人都係講：減租。執笠潮嘅原因，我相信絕大部份因為入不敷支做唔住，租金自然係其中一環。但係租金係咪唯一蠶食利潤因素？我哋拎上市公司最新盤數嚟睇。
食肆組方面：譚仔最近嗰份截至2023年9月中報，租金升咗9%，去到近2億5港紙，好多？人工升9.4%去到近3億5港紙，唔通咁計要減人工？睇埋大家樂，同期租金升4%到4億6，人工成本升1成到超過14億；同期大快活無拆條租金數，但人哋喺業務回顧都有寫租金穩定落嚟，能爭取更好租賃條件。雖然呢3間盈利有升有跌，但至少睇到租金係咪影響咁大？真係唔可以咁判斷。
金舖組方面：周大福截至2023年9月中報，港澳等市場租金開支多咗9.2%，但人工貴咗近1成半；同期六福、謝瑞麟、周生生、景福業績都無拆呢條數，但以上咁多間金舖都賺多咗，只得謝瑞麟蝕錢，而家又孭緊個盈警，但都無提及係租金因素。
綜合以上簡單數據，單純將啲舖頭執笠歸咎係租金並唔公道。香港租貴唔係第一日，問題係你賺唔賺到，如果啲商場幫你吸到人流，人哋做到你做唔到，然後你叫地主減租？講唔通吧？
上大陸玩呢樣嘢，玩疫情封關前不嬲都有㗎啦，拎今年同2019年復活節比較，都係多咗10%人經陸路口岸上大陸，唔好講到好似新鮮奇趣事咁。但點解香港食肆咁多執笠，問心，有幾多人受過香港食肆不禮貌對待？有幾多人覺得啲嘢好難食？有幾多人覺得喺香港食嘢十年如一日？概括講，就係顧客體驗好L差。呢啲舖頭，遲早都要被市場淘汰，大陸呢個因素只係加速咗佢哋應有下場。當然聽過有小部份業主瘋狂加租，但你覺得租唔到，咪搬舖囉，而家吉舖咁多，你檔嘢本身做得住，實會搵到地方繼續。
香港好多過往高收入行業都萎縮緊，經濟當然唔會好，而且easy money時代已經過去，香港好多玩social media叻過做產品嘅老闆們，你哋要諗下，究竟要鑽研點提升自己競爭力，定係繼續sell本土開post叫人留港消費。但奉勸一句，食理念呢樣嘢，玩得一時，玩唔到一世。
金缸經
註：專欄作家言論不代表本網立場
