麥美恩練「十字步」登台 鍾柔美最忌口窒窒 主持節目當特訓

Yumi自爆增磅，不過依然稍露纖腰。

「聲夢小花」鍾柔美昨日在黃埔出席團拜活動，自爆新年大解放狂吃賀年食品，搞到體重上升！她透露年初五已開工主持寵物節目，希望趁機訓練口才，戒甩口窒窒；麥美恩則表示正努力練習「十字步」，迎接巡迴登台。

薛家燕、麥美恩、曹永廉、鍾柔美（Yumi）、潘靜文及文凱婷，昨日在黃埔出席新城電台新春團拜活動，Yumi笑指新年假期主要是休息及狂食：「食咗好多嘢，好似年糕、蘿蔔糕同埋糖果，所以肥咗少少。」她於年初五已開工擔任寵物節目主持，覺得這是新挑戰，自嘲說話口窒窒，期望可趁機訓練口才。講到其After Class隊友姚焯菲離港讀書，她說：「好唔捨得佢，希望佢喺嗰邊開心，好好照顧自己，同埋唔好唔記得我哋After Class！」

薛家燕讚孫仔有音樂感

至於薛家燕主演的賀歲劇《黃金萬両》收視不俗，她表示：「好開心！當時拍得好辛苦，天氣好熱，搞到我全身濕透，連底衫、胸圍都索晒水要換！」剛返港的她3月將率領《黃》劇演員巡迴登台，先到馬來西亞，再到內地，認真豬籠入水，阿廉笑說：「家燕姐幾年冇登台，今年追番晒！」新年忙於登台的薛家燕帶家人同行，意外發現孫仔是可造之材，有機會合作拍廣告，她笑說：「個孫聽到音樂會跟住跳，估唔到歲半人仔咁有音樂感，係可造之材。」麥美恩表示正努力練習「十字步」迎接登台，近日則偕丁子朗去吳若希家中拜年，更與吳若希的囝囝錫錫！

文凱婷（左起）、潘靜文、Yumi、薛家燕、麥美恩及曹永廉，拉隊向街坊拜年！