Bossip｜屎蜢亂飛 良心Fundman何處有？｜Louise

早前中環寸嘴楊國佳請去富豪飯堂，食咗碟「鮑……汁撈粗麵」。咦，味道唔同咗，冇乜鮑魚味嘅？即彈鐘，加咗有鮑汁味的玻璃芡後再上枱，佢老哥細心分析下，指出世界難撈，人人哭股喪，少咗客人食鮑魚，又焉有發鮑魚嘅水做鮑汁呢？仲話唔係怕鮑魚「鯁」胃，顧住荷包乾硬化好過。

近日同基金經理聚舊，佢呻咗句：「今年邊個基金經理唔輸三成吖？」但説時輕鬆，鬼咩，管理費就收硬嘅。好奇之下，check其管理之基金，今年以來亦跌近四成。

【當心基金贖回潮】

早排收到銀行信，話戶口內兩隻基金有「重大」通告，若要轉出的話，會收取最高1%基金轉換費，記得同獅子銀行買時已經俾咗認購費，賣出都仲想「掠」？

等老娘有空去搵個RM問過究竟。此「重要通告」乃是市況最凶險時，即4月及6月發出，似乎係銀行同基金一方「扯貓尾」阻攔客人贖回。

出現贖回潮的話，基金經理未必有咁多cash，出現人踩人嘅事件，個fund 就死得。

有個已上岸嘅基金經理老友就話，去到最衰情況基金經理仲有權lockdown，咁就慘過封城要焗坐，有云「When the shit hits the fan」，呢句英文令我諗起初入行時，雜誌編輯部好事多為，疑有報道得罪有勢力人士，報館遂收到一份用報紙包住的大禮「屎蜢」，一群屎蜢在報館內亂飛之景象，真係媲美今年股、滙、債市況。

【英明fundman隱隱作痛】

早幾個月就有位資深嘅前輩，揭咗一位呢十幾年當紅嘅基金經理，個fund半年輸咗三成，搞到佢好唔開心屈住屈住咁。

好多時，散戶喺報章電視見得多個「嘜頭」就當係明星咁，幫襯埋冇乜出奇。不過呢位基金經理叫做有啲良心，起碼識得唔開心，仲肯伸個頭出嚟面對投資者，再起爐灶後，講到再輸的話，好似西楚霸王咁烏江自刎，呢啲都係壓力逼出基金經理嘅表現。試問天下良心fundman何處尋？

如幫襯銀行買零售基金，投資者又點畀到壓力個基金經理呢？唔通好似雷曼苦主咁，日日喺中環銀行門口做大龍鳳？

銀行介紹基金嘅單張，雖有提供基金經理名字，但究竟個fund轉過幾多手？每個基金經理對個fund貢獻有幾多等資料皆欠奉。

而魔鬼永遠在細節，有乜依郁，基金經理又有權修改條款， 以保障投資為者咁話。

一個已上岸fundman老友，以前一直叫身邊朋友唔好買基金：「基金經理人工唔低㗎，散戶冇必要去買基金吖，MPF就話要被屈去買基金啫，自己揀十隻八隻股票，使乜仲要俾人食管理費？」貴人早在身邊，該早聽其言。

Louise

https://www.facebook.com/louisewong15

註：專欄作家言論不代表本網立場

密切留意BossMind動向！立即CLS

FB Instagram Youtube