【一句到微】內容營銷要設立「內容資料庫」(嚴啟明)
相信唔少精明嘅企業,已經開始咗進行內容營銷喇。隨住內容項目增加,有無感覺到內容開始重複,甚至出現雜亂無章嘅情況?所以,搞內容營銷之前(或同時),最好先做妥「內容資料庫」,降低你管理嘅內容成本!
內容資料庫可以因應唔同層面,分成好幾類,以下為一普遍接受的例子:
1. 企業內部資訊
2. 行業資訊
3. 相關知識、不同觀點
4. 額外/其他資料
企業內部資訊係指,畀員工參考嘅內部營運資料。例如:一間手機公司將會喺暑假推出新型號手機。企業內部營運資料,就會涵蓋呢部新手機嘅商品資料同埋推廣時間表。呢啲資料可以令員工更理解企業,配合企業營銷策略。
行業資訊就係指相關行業分析。最簡單嘅例子就好似肉價飆升。對飲食行業成本嚟講,會影響到佢哋生意成本,呢類資訊就大派用場。分享呢類實用性資訊仲可以讓品牌或企業成為企業行內權威!
相關知識、不同觀點就係好似問卷調查和訪問等嘅鬆散數據。例如,某個社會組織對進行市民飲食習慣嘅問卷調查。食物供應商可以利用呢啲數據,決定食物產品的發展方向,將數據應用營銷當中。
額外或其他資料是指非上述幾類,但仍有些相關的東西。譬如賣手機的,儲存一啲通訊的趣事等。
內容資料庫應用範圍廣泛,喺員工創作內容嘅時候,入面嘅資料同過去數據可以大大減卻搜集嘅資料時間。假設一間手提電話公司想比較新、舊型號電話嘅性能,員工可以直接由資料庫搵舊型號手機嘅評測同新型號比較就OK!慳返好多重新評測舊型號手機嘅時間。另外,因為資料庫有內容發布紀錄,員工亦可以避免內容重覆地發布。
以足夠透明度運作
除此以外,企業亦要注意內容資料庫嘅透明度,令員工有足夠權限同渠道,使用呢個內容資料庫。而家已經有唔少企業會設計特定內容資料庫管理系統。網上亦都有唔少好似Google Drive和Dropbox等嘅雲端儲存空間,可以設定閱讀權限之餘,仲容許員工在虛擬空間閱覽、分享同增加內容。
喺資料系統化和透明度足夠嘅情況下,內容資料庫就可以持續發展。對企業,尤其係中小企嚟講,絕對係寶貴嘅資產!
嚴啟明(網誌kmyim.com)—Write4U網上創意寫作平台始創人,現為《信報》及《星島日報》撰寫案例專欄。