【胡．說樓市】新港城搵唔到心水盤？隔離「海柏花園」點揀好？

上次講完馬鞍山「新港城」嘅揀則策略，如果搵唔到心水盤，過隔離「海柏花園」得唔得？同「新港城」相比，「海柏花園」住戶較少，六座共提供1,102個單位，係「新港城」嘅四分一，要搵上車盤，又有咩攻略？

「海柏花園」位置較接近「馬鞍山公園」，以第三四座G及H室最標青，不單望到屋苑泳池景，還可透過公園，望到接近無邊際的「吐露港」海景。

同「新港城」一樣，景觀也是「海柏」樓價高低主因，而且差幅可以很大。代理指，「海柏」兩房高峰期成交曾高見800萬中的水位，但向東南的單位，由於望「新港城」樓景為主，價錢會相差一段距離，最近成交價也回落至605萬元。

今次參觀的單位屬「海栢花園」典型兩房上車間隔， 門口跟廚房位形成小玄關。廚房磁磚保留原裝交樓標準，整體保養得宜。客飯廳採直廳布局，但開則也算分明。一邊沿牆身放四人餐桌，客廳跟飯廳間造一個小飾櫃。至於客廳一邊放梳化，對面放地櫃，但兩者距離不算很深。

「海柏花園」兩房單位主要是直廳為主，另一款就是兩邊廳，有些人可能會喜歡面積大一點，就會選擇兩邊廳。

業主原打算放賣，但見市況回調「轉售為租」，叫租16,800元。按買入價204萬推算，收租回報達十厘。

若放賣的話，又值多少錢？歸納三大銀行估價，估價介乎624萬至705萬元，平均估價665萬，四成首期266萬元，月供22,343元，月入37,240元可過壓測。