雅虎香港財經 笑到最後｜時光倒流會否all in NVDA（高明）
Nivdia（NVDA）升至拆股後最高140美元，隨後開始回落，雖然AI股浮力無限，但以過往過百年股市歷史嚟睇，不論係黃仁勳、輝達、NVDA、AI等關鍵字嘅曝光率短時之內太高，先假設唔會散棚，但相信都會重回拆股前900美元股價上落嘅階段一陣子，之後再開車。
美股外幣即時報價 多國新聞任睇
穿越半年前都未必會all in
難得股價升幅有休息期，作為思考訓練，韓劇流行穿越橋段，如果畀你穿越半年前，約500美元水平，你會否all In？隨口噏憑空想像一定話會，但一個正常人到真係將手頭上所有資產變賣，再存入股票戶口，然後落買盤一隻NVDA，其實機會唔大。
先假設唔係啱啱大學畢業仲痴老豆老母住，戶口有廿零三十萬嘅畢業生，呢種人鋪鋪all In都冇所謂，後生大把貨，輸晒身家，返工半年乜都返嚟。
假設係正常有樓有車有其他資產嘅人，而all In定義唔係將股票戶口買一隻股，而係將所有資產包括層樓、債券、車、勞力士、結婚戒指、結他、高達等等，甚至仔女保險都斷供贖回，所有可以變賣嘅資產全部賣出，然後放入股票戶口買輝達，咁先為之全部買入all In。
變賣資產套現換馬 難上加難
答案係就算你明知NVDA半年內由500美元升至最多拆股前嘅1,400美元價格，正常人充其量最多都只會買盡股票戶口嘅錢，以及用埋券商畀你嘅孖展，係咁多，床下底珍藏盒絕版高達絕對唔會賣咗佢去all In。
另一現實問題，賣樓要時間，放盤到賣出，要快就要劈價，劈價又要NVDA追返，即使好彩，放盤即簽，最快都要一至兩個完先收齊錢，時間上半年內先賣樓後買股票，再捕捉升幅又太短。而由買NVDA到近期高位140美元，賣樓又要諗地方住，即使最慳皮方法痴老豆老母住，期間都要預錢搬屋同買新傢俬，甚至要稍為裝修滿足新居需要，畢錢消耗咗第二度，變相又all In唔到。
事實上，如果唔係全部資產變賣而買入，好難稱為all In，就好似股票行門口啲阿伯認叻話自己個倉升幾倍，但本金得兩萬蚊一樣。真係做到咁盡嘅人，對一個念頭咁堅信，亦好有可能已經all In咗落自己盤生意度。
除咗剛剛畢業嘅學生之外，極難見到真係會all In買股票嘅人，再引伸落去問題包括時間線終於返到不知未來嘅現在，沽唔沽貨好？沽咗再升多次上1,000蚊又點？唔沽嘅話，all In 後過住赤貧生活做「富窮翁」可以捱幾耐？每個月尾份糧去到呢個價位仲all唔all In？因為斷一次就唔算all In。
所以all In真係好難，做學生青春真好。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
