雅虎香港財經 傳「細龍太」陳偉琪因形象差被飛出《愛·回家之開心速遞》
無綫處境劇《愛·回家之開心速遞》自播出以嚟，收視及口碑都好過唔少重頭劇集，好似喺上月29日播出嗰集嘅7天跨平台總收視就高達33.1點。劇集唔經唔覺已經播出3年半，唔少劇集演員憑角色得到觀眾喜愛。不過劇集間唔中都有唔少演員暫離劇組，例如「博士」馬貫東、「Mandy」謝芷倫、「傻強」馮奕森、「Jacky」黎振燁及「垃圾清」周梓盈等等，最新有傳飾演「細龍太」雷珍妮嘅陳偉琪（Vicky）因形象差被飛出《愛·回家之開心速遞》。
有報道指由於陳偉琪喺上年10月涉醉駕及今年被拍到與外籍男士夜店親熱等負面新聞，所以無綫有意將她飛出《愛·回家之開心速遞》劇組，仲話甚至連其他演出機會都冇埋。
惡毒、巴辣又鍾意搞是搞非嘅「細龍太」雷珍妮都好耐冇出現，原因係自從佢幫爸爸雷公（白彪飾）吞奪咗接龍集團後，佢覺得自己出賣咗老公細龍生（鄭世豪飾），所以冇面目見對方。上星期三嗰集佢再次現身，劇情講到細龍生搵雷公追問老婆嘅近況，雷公就講出吞併接龍集團計謀，仲話Jenny唔想見到佢。不過細龍生唔相信Jenny會出賣佢，仲設法搵Jenny。當細龍生打探Jenny嘅消息後，佢懷疑Jenny可能喺香港，而且仲俾雷公軟禁。佢就搵廢柴同盟幫手一齊去雷公屋企營救Jenny。去到雷公屋企，細龍生真係見到老婆，Jenny仲講出出賣真相及向佢道歉。之後雷公仲話Jenny已經搭飛機走咗，短期內都唔會返香港。
陳偉琪接受傳媒訪問時，佢就承認近月都冇喺無綫開工。被問到「細龍太」幾時復出同其他工作安排時，佢就話唔知道，要等公司安排。
