雅虎香港財經 《愛·回家之開心速遞》Rebecca鐵面陳分手 沈可欣喊戲大爆發 網民：睇到眼濕濕
無綫處境劇《愛·回家之開心速遞》劇情貼地又搞笑，口碑同收視都好過唔少重頭劇。唔少演員憑角色成功入屋，幾對情侶更深得觀眾喜愛。不過噚晚（28日）嘅劇情就大返轉，唔再係輕鬆搞笑，而係悲傷嘅分手場面，當中一幕沈可欣嘅痛哭喊戲令觀眾及網民留下深刻印象。
噚晚劇情就講到Rebecca（沈可欣飾）原本計劃9月喺夢想中嘅酒店同鐵面陳（王致狄飾）舉行婚禮，點知突然收到酒店要提早停業裝修嘅消息。Rebecca非常徬徨就同其他新人成立苦主大聯盟，希望酒店可以俾佢哋如期舉行婚禮。雖然事件搞到Rebecca咁擔心，不過鐵面陳就好冷淡，覺得冇咩所謂。鐵面陳仲為咗公事，選擇放Rebecca飛機冇到酒店外示威，經大小姐（林淑敏飾）訓話後先勉為其難去酒店搵Rebecca。之後，酒店態度軟化，仲加碼賠償俾佢哋，Rebecca即時拒絕條件，鐵面陳就勸佢接受，因為覺得佢咁樣好失禮，結果佢哋喺酒店鬧交，Rebecca仲話鐵面陳對婚禮唔上心同唔係愛佢。
最後，鐵面陳約Rebecca到酒樓，講出自己嘅感受，並承認自己對Rebecca冇心跳嘅感覺，只不過係為母親同埋責任先同佢結婚，唔係真係鐘意佢，所以同佢提出分手。Rebecca嘅表情由驚訝去到崩潰大喊，再到用餐具扔鐵面陳，然後傷心離開。唔少網民睇完之後都紛紛留言大讚佢好戲，例如「😥睇到好抽心呀」、「今集好sad 你演得好好👏」、「分手場戲做得好好，加油💪🏼」、「今集演得好好👏🏻」、「演得好好啊！👏」、「睇到眼濕濕🥺🥺」及「你今晚場喊戲做得好好好呀👍👍👏加油😊」等等。
