憑《開心速遞》「鐵面陳」一角被封「暖男」 王致狄為演藝夢放棄愛情

貼地又高質嘅無綫處境劇《愛·回家之開心速遞》一直熱播，口碑及收視好過唔少正劇。除咗主要演員深入民心之外，一班配角演員亦人氣急升。繼群姐、池美麗、食屎陳師奶及譚道德之後，劇中飾演「鐵面陳」嘅王致狄亦成功突圍而出，獲得網民賞識，更被封「暖男」筍盤。

喺《開心速遞》中嘅接龍集團保安主管鐵面陳（王致狄飾），鐵面無私、為人正直、任何事都會秉公辦理。除咗同人事部經理Rebecca（沈可欣飾）有感情線外，佢更於今年3月播出嘅第532集中，雙手抱起群姐，開始被封為暖男代表，戲份仲越嚟越重添呀！

16歲喺加拿大讀完中學後，直入多倫多大學修讀經濟學，於2008年畢業。畢業後於當地銀行工作成為經理級，不過因為要照顧父母，所以決定回港生活。一直鍾意演藝生活嘅佢，2009年返港睇到招生廣告後，決意參加第23期無綫電視藝員訓練班而入行，當時嘅同屆同學楊潮凱、羅天宇及近期播出劇集《婚姻合伙人》嘅林秀怡。其後為咗追演藝夢，王致狄被逼與當時女友分隔兩地，長時間不能見面，感情變淡，最終分手收場。

唔經唔覺已經入行10年，佢仲拎咗無綫嘅「十年老人牌」服務獎，現時憑四十二吋胸肌及「鐵面陳」一角成功入屋，深受一班觀眾及網民歡迎。默默耕耘咗10年，一直飾演閒角或者唔起眼角色，今次終於憑「鐵面陳」一角成功上位。

入行後嘅王致狄為自己訂立目標，就算無論遇到任何困難，佢都希望做好每一件事，更視演藝為佢終身職業。就算佢知道娛樂圈嘅收入，冇以前做銀行一樣咁穩定都好，佢都決意去追尋自己夢想。