雅虎香港財經 操盤手札記│世界盃開波 淡友或反攻（割柑人）
千八億舞高大市重演！港股繼前周五1,886億元舞上5.4%後，上周五又見1,826億元舞上7.7%，淡友節節敗退，皆因：①美國通脹放緩；②中國防疫放寬。美國上周四公布，10月CPI按年升7.7%、按月升0.4%，核心CPI按年升6.3%、按月升0.3%，全都低過預期同前值，加息壓力紓緩，刺激美股以至環球股市造好。另中國上周五公布，入境檢疫日數由「7+3」改為「5+3」，刺激中港股市造好。
美股外幣即時報價 多國新聞任睇
美國通脹過一關，聯儲局可望下月放慢加息步伐，美滙指數連跌兩日，由110水平跌至106.42，係8月中以嚟低位；10年期債息由4.1厘水平跌至3.8厘，係10月初以嚟低位；美股三大指數則連升兩日，納指累升9.4%，係2008年以嚟最大兩日升幅，跑贏道指嘅3.8%、標指嘅6.5%。全周計，道指累升4.1%；標指累升5.9%，係6月以嚟最大單周升幅；納指累升8.1%，係3月以嚟最大單周升幅。
供需再平衡 通脹稍放緩
然而，睇返通脹數據，核心CPI只係由爆表嘅40年高位6.6%稍降至6.3%，主要係核心商品價格下跌，皆因：①供應方面，全球供應鏈瓶頸紓緩，海運成本下降；②需求方面，連番加息，民眾消費意願下降；不過，價格持續下跌空間有限，一來庫存未高到要劈價促銷，二來勞動力成本仍高。10月通脹放緩，主要反映商品供需嘅再平衡，同統計上技術性因素嘅擾動，喺其他服務業方面，未見通脹降溫證據。
因此，現時淡友敗退只係伺機而動，畢竟通脹放緩唔代表通脹唔高，加息步伐放慢唔代表加息可以停步，一旦數據欠佳，即可藉機發難。除咗息口、衰退會係造淡理由，中美關係亦然，尤其涉及金融、科技之爭。雖然距離美國下月中議息，好友有一個月空窗期進攻；但期間有世界盃魔咒，股市例淡，下月中前，除非通脹同就業數據都過晒關，否則淡友隨時反攻。
航空股展翅 國泰可留意
港股上周五收17325，夜期高水226點或1.3%，港股ADR比例指數高水112點或0.6%，反映中概股嘅納斯達克金龍中國指數升6.6%。恒指月初急升後，上周中段整固，回調至16000水平見支持，上周五裂口上升，創一個月高位，預計下周一世界盃開波前，可挑戰10月5日上升裂口及6月以嚟下降軌17600水平，若能突破，可再挑戰9月22日下跌裂口18200水平；世界盃開波後，則預計會回調。
中國上周五優化防疫措施後，翌日疾控中心指不排除進一步優化。香港更自9月26日起，入境檢疫日數由「3+4」改為「0+3」。據滙豐（005）香港區財富管理部門數據，喺新措施下，港人外遊大增，滙豐客戶喺機票相關信用卡簽賬額按年增7倍，旅行社相關消費按年增3倍。隨着防疫漸放寬、航班漸恢復，國泰（293）可留意，集團上周五宣布加密中港航班，該股現價7.86元，目標睇9月高位9.2元，止蝕睇7元。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
是日精選：
