爆一爆｜向撻訂買家追收差價 小超有乃父之風（Louise）

地產界風聲鶴唳，最兇險既係長實（1113.HK）向撻訂買家追收差價。其中包括洪水橋嘅樓盤#LYOS(Live Your Own Style)。 日前揸車到洪水橋直擊下呢個新盤乜料。小妹雖為元朗人，但甚少踩到去洪水橋，事關沿青山公路開車，有唔少紅綠燈非常耽誤時間，轉入去洪水橋西北開發區，要經過貨倉、不少貨車及泥頭車出入，都要打醒十二分精神，未到樓盤之前，見到有「洪水橋公廁及浴室」嘅政府設施 ，有埋浴室設施大概知道個社區是咩style。

下載Yahoo財經APP

美股外幣即時報價 多國新聞任睇

#LYOS被公屋房協樓包圍

長實這個#LYOS樓盤，外貌有點像高級版嘅過渡房屋同心村，樓高五層，對面就係公屋洪福村，旁邊係房協樓盤樂翹樓，年初開售呎價6000幾蚊一呎。再行多兩步就有個興建中嘅社區回收中心， #LYOS被四面八方嘅公屋及房協樓圍住，身如其中恍如一個金魚缸。

#LYOS 對面為公屋洪福邨

#LYOS 旁是房協樂翹樓，呎價$6000-$7000。

2021年開售嘅時候，呎價去到$1.5萬，有個地產經紀話：「呢度嘅買家都係諗住中、港兩邊走嘅。」咁又係，如果想出市區就要坐巴士，仲要站站停， 所有洪水橋新樓「賣點」，就係能駁上西鐵嘅洪水橋站，唔好意思，要2030年先至通車，仲起緊。住係呢度擺明做開荒牛，所以買家撻訂有其道理，然而追收差價又有冇道理呢？

長實一直強調「尊重合約精神」

長實嘅法律部團隊人才濟濟，樓市自2003年起只升不跌，好多人對以往樓市血淚史都好無知。長實一直強調 「尊重合約精神」，所以小超李澤鉅亦有乃父之風。

#LYOS2021年開售嘅時候，呎價去到$1.5萬。

1997年金融風暴前，有唔少人以$4500到$5000一呎，買咗嘉湖山莊美湖居， 當然就係一殼眼淚啦，好多都脫手離場蝕一百幾十萬，但亦有過百小業主撻訂俾長實追收差價。當時嘅民主黨成員陳偉業（大嚿） 就協助呢班美湖居嘅業主向諴哥施壓，拉橫額請願乜都出齊，最後連陳偉業都被長實告誹謗，單撻訂訴訟搞咗八年，法庭最後判長實勝訴，班撻訂業主惟有登埋報紙寫公開信向誠哥跪求放佢哋一馬。誠哥亦都因為呢單嘢非常之谷氣，當時李嘉誠話：「今時今日香港嘅政治環境，已經再無可能投資一百億元在港了。」廿年前的一句話，今日仍然嗒落有味。