雅虎香港財經 笑到最後｜ChatGPT只係第一代電飯煲（高明）
可能因為香港冇得直接使用ChatGPT，以及New Bing，AI嘅功用被神化或妖魔化，一就係將佢當生神仙，有任何問題都掟俾佢，事實上稍為用過都知，你要佢提供意見，佢只能夠比模棱兩可嘅答案你；二就係妖魔化，覺得佢將會取代大量工作。
美股外幣即時報價 多國新聞任睇
要解釋呢個問題，就要由兩種完全唔同，但係性質好相似嘅技能入手：分別係寫作以及煮食。文章以及書本被認為係精神食糧，煮食質係直接產生食糧，兩者最相似嘅地方，就係中間人作者以及廚師並無產生任何新嘅嘢出嚟，只係將現有材料轉化成一個新嘅產品。
以寫文章為例，文字、資料、新聞等等，全部都係現有嘅材料，作者只係將上述嘅材料轉化成可讀嘅嘢，包括新聞稿、書、youtube片嘅對白稿等等。
至於煮嘢食，廚師亦唔似得農夫咁將食材種出嚟，廚師主要係將蔬菜、肉類、醬汁、水等等嘅材料，轉化成為食物。所以以上兩者係有共通點。
煮食嘅工具過去一百年進步十分巨大，由柴火、火水爐，去到近代通用嘅煤氣爐及電磁爐，產生熱力煮熟食材嘅工具，演變咗好多。除此之外，煮食用有電同冇電嘅工具，亦都進化咗唔少，曾幾何時機器搓麵粉只係商業用途，到今日屋企有部廚師機都唔係好奇怪嘅事。另外亦有低溫煮食以及分子料理等過去未存在嘅煮食方法。
個別有上市嘅餐廳更加用機器炒餸，本來好似淘汰咗廚師咁，但係包括本人在內，食落味道覺得有唔同，某啲位都係真人廚師煮好過機器煮。
奇怪嘅係，煮食工具進化咗咁多，咁多年來好少人講：「嘩，發明咗廚師機啦，以後唔使廚師啦。」
同樣嘅問題去到寫文章身上，就會變成：「嘩，發明咗AI啦，以後唔使作者啦。」
寫作同廚師 一樣難取代
如果真係有持續寫過文章，再去同煮食比較，大概就會知道，寫文章相對煮嘢食係幾咁落後，寫文章仲係自從造紙術發明之後嘅產生方法冇乜點變，一張紙一支筆一個人，即使近代改為電腦、鍵盤、手機，原始嘅程度有如用火水爐、石油氣爐煮食，連電飯煲水平都未去到。
ChatGPT嘅出現，大概只係電飯煲，功能仍然比較單一，煲味道直接嘅白飯、稀粥，好過真人落手落腳去煲，勉強可以當微波爐加熱用，但有時會加料又未必係用家樂見。
煮食冇規模效應，寫作有，呢個都係事實，亦都令廚師比較難難取代，因為一送餐送得遠，一係唔做，一係走味。寫作走味則以語言作邊界，寫中文去毛里裘斯冇人理你，即使用係英語世界，倫敦人同紐約人睇嘢嘅口味都有分別。
睇吓你用咩角度去睇，現時只係電飯煲咁上下技術，如果取代到，未來出到寫作版份子料理時，可能會令好多人吃不消。另一個角度，其實都只係件工具啫，冇理由見到個電飯煲好驚、又或者問個電飯煲今晚煮乜餸掛？
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
