雅虎香港財經 股神拍檔芒格係咪「逢新必反」！？
巴菲特拍檔芒格係當今世上「人瑞級」投資大師之一，亦因為年紀大兼說話一針見血，近年有年輕投資者認定他係不願接受新事物的老人家，咁究竟芒格係咪「逢新必反」？
美股、外匯、加密貨幣免費即時報價，自選投資組合獲取相關新聞提示。
芒格炮轟三大散戶心頭好
當越來越多美國散戶湧入股市時，芒格（Charlie Munger）最近現身Daily Journal股東會時就接連炮轟散戶三大心頭好。早前美國Reddit仔散戶合力炒起GameStop（GME）擊退對沖基金，被散戶視為在市場發揮群眾力量的有效例子，及後更添食炒起AMC等跌到殘美股並進攻白銀市場，部分散戶更一夜致富。不過芒格直言GME事件反映投資者視買股如賭博，一如當年英國股民瘋炒南海公司般最終血本無歸，更批評免佣交易平台係令市場出現泡沫原因之一。
散戶另外兩大心頭好：Tesla及比特幣，芒格毫不客氣回應指「不知道哪一個比較糟」，更直言比特幣波幅太厲害，難以成為全球交易媒介，與他在2018年警告加密貨幣不會有好下場立場一致。
單從芒格點評散戶三大心頭好，似乎他對新事物有點看不順眼。但再細看芒格對經濟趨勢及一些投資舉動，指他逢新必反可能係一大誤會。
投資新發明輸身家
芒格在Daily Journal股東會上承認不少企業護城河看似無法逾越，但仍有人會找到取代其優勢的方法。他在加州理工訪談上，又指企業經營可類比為生物學，所有物種都會消亡，同樣地在企業世界有新事物興起亦有舊事物消亡，例如百貨公司、報紙都是正在消亡的事物。
既認同企業護城河有新舊交替，芒格自然不會對新經濟全盤否定，他睇好雲端服務、網上零售，還有各國爭相研發的電動車，當然在商言商，他繼續睇好比亞迪在電動車市場的競爭優勢。甚至唔少企業CEO反對繼續在家工作，認為員工應回歸辦公室提升生產力，芒格都估計即使疫情過去，增加遠端辦公仍是大趨勢，或許基於此原因，巴郡已持續吸納電訊股，皆因網購、在家工作及使青雲端股市，通訊服務都係最基本的配置之一。
值得一提係芒格年輕時曾熱衷投資創科，甚至去到賭身家地步。他在訪談中自爆年輕時將大額儲蓄投資一款名為William Miller的示波器，但當準備推出市場時，已有更先進的技術面世，結果這部儀器最終只賣出三部。首次押大注創科就輸身家經驗，芒格深切體會到科技既係機會亦係「殺手」，亦令他之後有一段很長時間避開科技投資。
從芒格的思路睇，他的大原則始終係避開投機，甚至係賭身家級的投機。他認為錯誤往往源於人總係認為自己聰明，不少聰明人認為自己較實際上更聰明，很明顯這是危險的。以芒格的視點看GME瘋潮，固然有散戶賺大錢，但後來亦有不少交了巨額學費的新手，更何況散戶追捧的GameStop及AMC分別經營實體遊戲店及戲院，都算不上係甚麼創新經濟。從芒格用96年累積出來的經驗之談，你就會理解聽到女股神提到未來最大投資驚喜係來自基因編輯，第一件事係了解一下這是甚麼東西，而不是下大注追逐相關概念股，才是增加自己投資路上「續航力」的實用竅門。
伸延閱讀
