豐田會否笑到最後
豐田社長豐田章男早前炮轟日本政府禁售燃油車政策,更力數純電動車先係唔環保。此言一出有花生友已講定豐田將步Nokia後塵成為科技轉型大輸家,不過至少有兩大理由,豐田或有機會笑到最後。
Tesla極速成為電動車霸主,中國比亞迪成為香港股王之一,令電動車才是皇道硬道理深入民心。相比之下,豐田死守混能車似乎有點守舊。不過豐田的混能車其實亦有電動車「成份」,只不過係靠行車時制動能量及透過電池蓄電,即係電能自給自足作為補充能源。揸過豐田混能皇牌Prius系列,都知道慳油力相當強勁,大大降低入油密度,作為日常代步,現階段仍較揸純電動車搵叉電地方來得方便。
內地缺電隱憂
混能車最大隱憂係各國急推政策趕絕燃油車,有兩個理由或會迫使各國政策急轉彎。首先係缺電,近日內地缺電情況提醒大家,燃料供應鏈中斷,停電問題就遠較想像中嚴重。當日常生活密密停電,純電動車即淪為廢鐵,反而混能車就來得可靠。
另外係天災,水災、地震、大型山火都會極速重創電網,可能幾個月都未能恢復供電。地球年年都面對極端天氣時,大型天災出現亦會揭示電動車的致命弱點。
電動車問題未浮現
更重要一點係豐田提出的電力結構問題,各國電網似乎並未準備好全面接受電動車,如果因為供需問題電費貴,唔計環保份子,揸電動車就會成為搵自己笨之舉。
當消費者領教過有車無電用難題,既會施壓迫政府留住燃油車,更會用腳投票改買油電混能車。屆時純電車廠商反而可能要推出混能車留住客仔心,混能車一哥豐田社長或許正係預示這兩項因素,在不久將來豐田可以笑到最後,因此繼續堅持反純電動車吧。
相關文章:
===============
精選資訊網站「中環街市」 臉書粉絲頁