CFO財報解密│恒大兩蚊收購恒大汽車養生空間項目嘅深層計算(Benny)
恒大集團(「恒大」)(3333)4月24日公告向子公司恒大汽車(「恒汽」)(708)以人民幣2蚊雞收購養生空間住宅物業項目。
美股外幣即時報價 多國新聞任睇
呢個收購喺恒大公告中簡直係點石成金之作:
一、將恒汽地產項目賣走,令到市場對恒汽嘅純新能源汽車業務估值提高,所以對恒汽有好處。
二、對恒大嚟講,因為子公司估值升,作為持有子公司嘅阿媽自身價值都自然會提升。
三、對恒大債權人嚟講,因為恒大債權人可以獲得可轉換恒汽股份嘅債券(即係恒汽可換股債券),咁當恒汽估值提升時,揸住呢啲CB嘅債權人都會有所得益。
橫睇掂睇都係win win win 局面,咁邊個會有損失?從恒汽角度睇,呢個出售會令恒汽即時有人民幣248億出售收益入帳損益表。恒大都係出兩蚊收購啫,點解恒汽可以賺咁多呢?因為個養生空間項目而家係淨負債248億。即係恒汽賣養生空間項目,實際就係剝離248億淨負債,而且冇任何代價,所以咪有248億賺囉。
恒大條數又點計
其實本身恒大持有恒汽約58.54%權益,而恒汽就持有養生空間項目100%權益,即係恒大本身間接持有養生空間項目58.54%權益。
咁今次說穿了就係恒大用兩蚊收購埋本來屬於恒汽少數股東嘅41.46%嘅養生空間項目權益。
如果簡單啲計,養生空間項目淨負債248億,假設恒大同恒汽少數股東各持有50%權益,即係各持有124億淨負債。
咁而家恒大由少數股東手上買埋50%權益(其實唔係權益,係負債124億),而恒大係無其他額外值錢嘢收到嘅,即係無端端硬食咗124億淨負債,咁佢嘅淨資產就會減少124億。
養生空間項目本身就係恒大嘅非全資子公司,由於控股權無變,所以呢個淨資產減少係唔會反映喺恒大損益表,但就會以減少少數股東權益(增加負債)反映。
真正贏家同輸家
咁講到尾,如果恒汽完成出售養生空間項目,佢手上就只剩番兩個地產項目,而且其中一個會喺6月底交付俾買家,對佢想以純新能源汽車業務去俾市場估值的確係有幫助,升唔升值就唔知啦。但確確實實嘅係佢唔洗任何代價就剝離咗248億淨負債,如果佢而家唔係停牌,其他因素不變,真係即刻升值200幾億唔出奇。
咁恒大呢?子公司估值升唔升值無人知,但即時效果係恒大多咗124億負債。咁點解恒大已經負債累累,啲債權人仲會俾佢無償硬食多124億債?因為不嬲債權人同股東嘅利益都唔一致。
恒大淨資產減少124億,股東權益就直接受損,但對債權人嚟講,恒大多幾條債如果還唔到都係無分別,反而佢哋可以收到可換恆汽股份嘅債券,即係恒大債轉恒汽股,就可能着數咗。
因為債權人變相係揸緊淨資產升值248億嘅恒汽股份,而恒大股東除咗硬食124億資產減少外,仲要有機會因為債權人轉換恒汽股份後,攤薄咗佢哋本來對持有恒汽權益嘅比例,如果到時恒汽真係估值上升,就更加傷啦。
Benny Yam
執業會計師
Facebook:https://www.facebook.com/cfobenny/
Patreon: https://Patreon.com/Cfo_benny
本欄隔周三刊出