CFO財報解密│蘋果護城河缺口乍現(Benny)
跟進返我1月24日Yahoo財經文章,分享蘋果走弱因素慢慢浮現,當時股價US$194,去到最近就已經跌到US$175,就算係美股大盤指數屢創新高嘅氛圍之下,佢一個月嘅跌幅都差唔多已經有10%。當時我嘅結論係軟件開發商對AppStore嘅挑戰可以蔓延開去。呢個正正體驗喺佢前日最新嘅一個關於Spotify歐盟反壟斷罰款18億歐元案件上面。
美股外幣即時報價 多國新聞任睇
服務收入逾70%毛利率
智能手機市場近年十分飽和,銷量上要有突破性增長的確唔容易。所以蘋果最近業績會,管理層焦點都係擺落佢哋20億iOS註冊用戶同10億付費用戶嘅龐大服務收入增長潛力度。本身我都好認同佢呢啲海量嘅用戶數,只要每人每季使多幾蚊,就已經可以有雙位數服務收入增長,而且邊際成本有限,形成有超過70%嘅高毛利率。
但係啱啱歐盟對蘋果罰款18億歐元嘅判決,指控蘋果App Store限制軟件開發商向iOS用戶提供更平嘅串流音樂訂閱平台選擇,令到用戶近十年都支付咗更昂貴嘅串流音樂平台訂閱費用(因為佢哋要承擔開發商支付畀蘋果嘅高昂蘋果稅)。同樣地喺今年1月美國加州關於蘋果反壟斷嘅判決,又係指控蘋果唔容許遊戲開發商同用戶溝通用非蘋果支付系統,以更平嘅價錢去購買遊戲嘅token。
擁抱競爭利潤添壓
而家蘋果因為呢兩個案件判決,都不約而同地需要喺佢App Store度加入額外嘅連結或者按鈕,畀用戶有權選擇用蘋果以外嘅支付系統、購買平台去買唔同範疇(遊戲、音樂串流)嘅軟件、服務,呢個就係我所講嘅護城河缺口。
反思番上面兩個案件嘅共通之處,對蘋果嘅指控都係話佢扼殺咗iOS用戶嘅選擇權(唔係話一定唔可以用iOS支付系統或者下載軟件),令所有用戶喺使用iOS軟件時都要全部或者部份承擔高昂嘅蘋果稅。個感覺就好似明明有兩條隧道可以行,但係蘋果利用佢生態系統管理員嘅角色優勢封咗一條平啲嘅隧道唔俾你揀,令用戶只可以行貴啲嗰條隧道。
而喺聽日即係3月7日,蘋果因應歐盟數字法案,要求整體App Store都需要為歐盟用戶提供選擇喺App Store定係喺軟件開發商平台下載軟件嘅權利。
當然蘋果面對呢啲反壟斷嘅要求同指控,官方說法係網絡安全同用戶私隱更有保障去說服市場同埋用戶:就算畀更貴嘅服務費都係有佢嘅原因。呢個說法冇問題,但係個問題係你要畀人有得揀,而唔係你幫用戶揀咗。再簡單啲講,即係你唔可以防止競爭,你要擁抱競爭。
咁你可能會話競爭之下蘋果都未必會輸畀其他開發商,呢個的確係未知之數,但係裂紋已經浮現。因為蘋果即將推出為滿足歐盟數字法案嘅新措施內容,包括如果軟件開發商唔自立門戶設立獨立嘅下載平台,可以享有大幅折扣嘅蘋果稅優惠。呢個係一個好好嘅示範:當蘋果逼不得已要擁抱競爭嘅時候,原來佢係可以大幅減低收費。亦都代表佢牢不可破嘅護城河裏邊開咗一個小窿,說明佢原本嘅高收費水平,除咗部份係因為佢高質素嘅生態系統之外,另一部份可能真係因為佢限制咗用戶選擇、防止競爭嘅一個溢價。
雖然歐盟區服務收入佔蘋果總收入唔夠10%,但都係嗰句唔係金額問題,而係當唔同地區監管嘅反壟斷趨勢,開始引發佢iOS生態系統護城河嘅小缺口、小裂紋嘅出現時,我哋要反思蘋果嘅核心競爭力,長遠會係走強定係減弱呢?
Benny Yam
執業會計師
本欄隔周三刊出