CFO財報解密│ATM回購與股價表現反向的迷思(Benny)
阿里巴巴(9988.HK)最近季績宣布股份回購金額,三年總共增加至353億美元;騰訊(0700.HK)季績都宣布回購金額增加一倍到1,000億港元;而美團(3690.HK)就反其道而行,除咗已經宣佈咗嘅10億美元回購外,暫時唔會再增加回購金額。
美股外幣即時報價 多國新聞任睇
大手回購市場反而唔受落?
但年初至今巴巴股價竟然下跌7%、騰訊微升4%,反而美團就大升24%。就算係近一個月表現:巴巴下跌2%、騰訊升7%,而美團就升14%。說明呢一刻回購金額最多、時間最長嘅巴巴最唔受市場追捧,究竟點解?
突然大額增加回購預算除咗代表間公司好有錢,通常都係因為公司管理層覺得個股價正處於水深火熱之中、不得不反向操作:即係由抽走市場資金嘅股份發行者變成向市場放水變成公司股份買家。
但巴巴成個回購計劃橫跨3年時間,就已經唔係只針對短期股價問題,而係令人中期業務經營上,管理層似乎無乜增長策略?或者搵唔到好嘅投資項目去推動公司價值,反而回購自家股份係佢地嘅首選?
巴巴欠增長動力 股價跑輸
巴巴最近業績收入只係增長5%,但經營利潤急跌36%。而管理層sell畀市場嘅就係將阿里巴巴股份定位為類似美國債投資工具。美國債而回報率4%至5%,而且係無風險。阿里巴巴股息再加股份回購後,回報率係似美國債,但就唔係無風險。所以呢個定位有啲奇怪,同時亦反映喺業務增長上,畀唔到市場新憧憬。
騰訊雖然中國遊戲業務都係疲弱,但最新業績毛利率達到50%近年高位,說明管理層的確做到控制成本、提升利潤率嘅承諾,令佢整體盈利能力比起一年前大大提升(撇除上年分派美團嘅非經營性收益),喺營運效率上俾到市場憧憬,所以股價最近都有明顯支持。
至於美團,業績數字依然冇起息,新業務增長放緩、虧損依然、靠本地核心商業支持增長。但管理層喺業務策略承諾唔再盲目追求市佔率,注重提升盈利能力,會加番價同減補貼。個核心方向就係迎合市場一路以來嘅訴求:減少一直有重大虧損業務,集中高利潤業務。而且美團都好直接唔再加碼大額回購股份支持股價,說明管理層對業務上嘅增長潛力依然有信心。
有回購再加業務有增長當然係最完美,但當一間上市公司提振股價嘅招數長期只集中喺回購股份度,咁就要諗清楚會唔會令市場擔心佢嘅業務增長已經失去動力。
Benny Yam
執業會計師
本欄隔周三刊出