FI專欄｜寃家路窄 中環頂心杉｜Louise

FI專欄｜寃家路窄 中環頂心杉｜Louise

與友人到尖沙咀zentre H 樓上食肆午飯， 眼前維港景盡收眼簾， 睇住對岸和記大厦重建，頂住後面恒地(00012)中環地標The Henderson，以及508億投的中環海濱地，友人憂恒地債高，考慮要「掟」手頭恒地股票蟹貨。

0+0無望，金融企業及人才搬去新加坡， 寫字樓都好大獲，空置率創新高達10.2%，中環成重災區。 出年重建完成的和記大厦，成為The Henderson 嘅頂心杉 ，正所謂冤家路窄，兩位李家公子爭完海景，嚟緊仲要爭租客。

跨代恩怨情仇

上一代四叔為爭 「首富」之位 ，早已同誠哥有心病，估唔到延續到去第二代。 和記大厦重建嘅章法， 就睇到小超李澤鉅點樣食住恒基上。 和記大厦重建早於2008年批出， 但長實遲遲未拍板，之後係2012年改則，直到 2017年當恒基用「天價」五萬蚊呎投得美利道停車場 ，長實先至去馬重建，原本廿三層加至四十一層高， 你都咪話唔高招 ，有恒基係後面「撐」住5萬蚊呎， 再掟五六十億落去重建，樓價就自動升值。 現命名為長江中心二期，賣點係全海景寫字樓。

500億完海景夢

四叔以往在中環沒自己嘅地標，八，九十年代總部係環球大厦，後來搬到同新地夾份發展的IFC，但始終唔似得誠哥有自己個「竇」長江中心咁威。所以美利道項目，名正言順叫The Henderson。

恒基為咗在中環再插支大旗，去年又以508億投得中環海濱地皮， 較第二條標高出近140億 ，地產界中人認為係逆市以三萬蚊呎托住地價，都係為「報效」中央而已，雖知恒地成手新界農地，正所謂你識做，佢又識做，若能放生農地發展，又係另一條數。所以四叔最錫嘅孻仔李家誠謂，投得中環海濱地，四叔笑到見牙唔見眼。但呢幅地只能「躺平」發展起十層樓高，免阻擋後怡和大厦一堆寫字樓之海景。

恒地以508億投得中環海濱地皮，保證有海景。

首富有心病

近廿多年長實及恒基冇合作，其實以往四叔同誠哥曾經行得埋，在半山携手發展「嘉兆臺」，屋苑取名自兩位濶佬。後來，誠哥，彤叔及四叔在上次移民潮殺去溫哥華買入世博塊地，發展萬博豪園，當時香港人搶住買，聽講四叔因為分咗啲「豬頭骨」 ，同誠哥種下嫌隙，咁鬼叫誠哥係大股(佔51%)，四叔及彤叔細股（各佔20%）。

去到90年代尾， 兩李亦都係因為 「首富」之爭而患有心病。 有次馮景禧個仔馮永祥禹銘搞酒會，請到城中大孖沙駕臨，四叔見誠哥在一角與馮永祥傾談，四叔甚為迴避站在另一方，場面都幾尷尬。反而，臨走時四叔拖住彤叔手仔。 有年四叔在其自傳中特別點出其「首富」身份。其實首唔首富，誠哥話齋「於我如浮雲」，正所謂他朝君體也相同。 有口痕友仲話 ，四叔一直住半山麥當奴道，雖然好風水， 但就唔及誠哥一直住獨立屋咁夠格 ，所以四叔一把年紀都要在山頂白加道起三間獨立屋自住， 不過「李氏皇宮」地庫停車場仍在動工，仍未入伙，只見入口門牌用布密冚，莫非要請道士來開光？

白加道「李氏皇宮」仍未入伙，門牌用布包到冚。

註：專欄作者的觀點不代表本網立場。