香港股市 已收市

吉野家香港獨掂

日本吉野家公布業績,去年全年蝕8.9億日圓,跑輸另外兩家牛肉飯巨企食其家及松屋。這邊廂經營內地吉野家的合興都表示受減價戰拖累,生意做多了但就純利就減少26.7%。相比之下,香港吉野家生意就似明顯勝一籌。

吉野家陷入捱打困局,有日媒分析指乃吉野家受制於強調便宜的企業口號,在加價上猶豫不決,加上開發新產品步伐落後於同行,令客人持續流失。至於內地吉野家,據合興解畫乃因內地餐飲企業減價戰熾熱,旗艦產品企硬唔減亦難以加價,並要推出1115元人仔平價產品應戰,講到尾,情況與日本吉野家大同小異,無得靠適度加價平衡成本上升。

反觀香港,吉野家定價相對同行唔算平,但各區分店保持旺場,特別係晚市打邊,唔少人每星期至少食一次,成為媲美譚仔的Soul Food。對照日本及內地吉野家,香港吉野家擁有硬淨的叫價能力,似乎成功摸到本地客人的口味,亦願意投入資本研發新口味產品,令品牌不會像日本吉野家般成為中坑大叔醫肚勝地,而係美少女打邊或男士毒食的首選。

值得一提係香港吉野家其實同樣屬於合興集團洪氏家族,但合興太子爺已表明暫時不打算將香港業務注入上市公司,睇來係香港業務盈利能力不俗所以暫時留為己用,假如日後終於把香港吉野家成功模式複製到內地分店網絡,而日本吉野家仍舊未擺脫困局,或許就會出現日本7-11注資救美國7-11般,由香港合興入股日本吉野家,甚至把吉牛丁麵及毒毒吉野打邊「逆向輸入」日本市場也未嘗不可呢。

===============

精選資訊網站「中環街市」  臉書粉絲頁