雅虎香港財經 太唔是何｜英國租樓好困難 真係因為我悲觀？ ｜400歲人瑞
400歲人瑞回想初初來到英國嘅第一兩個月，最令人沮喪嘅，就是搵樓租實在好難。樓盤少、競爭大、關卡重重，令初到貴境嘅400歲人瑞當時日日憂心忡忡，今次就同大家分享一下當時遇到嘅挑戰。
來英國之前，400歲人瑞已一早訂好一個月嘅Airbnb，俾自己一個月嘅時間去搵租盤。當然到埗之前亦時常上Rightmove網站睇下有咩盤，睇下啲盤嘅租金大概係咩價位，等自己好有個預算。嚟到之後，急不及待就開始約睇租盤。開頭諗住慢慢揀下、睇下，設定好多要求俾自己，例如唔要頂樓、唔要地下、要新簇簇嘅等等。不過，當去到揀到個心水盤後去預約睇盤，400歲人瑞就知道，有時有啲嘢唔係你揀人，而係人揀你⋯⋯
通常預約睇盤有幾個途徑，網上預約係最常見嘅一種，你可以喺Rightmove網站直接網上預約，理想情況係喺網上填上簡單嘅個人資料，然係喺一兩日內就會有個經紀打俾你，預約你嚟緊嘅周末去睇盤。咁實際情況呢？就係你填個人資料時發覺佢問嘅問題殊不簡單！通常問問下就會問到你做緊咩工、一年工資係幾多、一年全家總收入有幾多⋯⋯等等。
好似400歲人瑞呢啲仲未開始搵工嘅，點填呢？填乜呢？咁就唯有漏空佢啦，但係原來漏空佢，係「提交」唔到個預約表格㗎！即係點？即係如果你無份工嘅話，你連「預約睇樓」嘅資格都無！然後400歲人瑞就諗到一個有雞先定有蛋先嘅問題：搵屋又要我填工資，但搵工又要我填英國住址⋯⋯
咁都有第二個情況嘅，就係佢要你提供資料等佢去查你個「信用評分」，咁400歲人瑞初到貴境，啲信用評分機構根本未為400歲人瑞開「file」，查乜呢？好啦咁400歲人瑞就試下喺啲信用評分機構登記一下，睇下啲信用評分機構可唔可以幫400歲人瑞開個「file」等啲經紀可以參考下啦。登記就要填個人資料，其中一項就係填住址，你試下填Airbnb個地址落去？佢會隨即問你住咗幾耐，住咗一個月都無？咁你之前住邊？住香港？對唔住個信用評分機構見到咁就唔會再俾你撳落去。又係有雞先定有蛋先嘅問題：搵屋又要我提供信用評分，登記信用評分又要我填英國住址⋯⋯
400歲人瑞同啲電腦表格來來回回對打打到覺得好沮喪，將要求無限降低都未試過成功預約到睇盤，想搵個真人嚟親自解釋一下自己嘅情況。於是直接打去經紀問下預約睇盤啦，透過電話與真人對話，400歲人瑞自然唔會放過同經紀解釋返自己有咩有利條件，就係可以一次過預繳全年租金。部分經紀聽完依然係會問你有冇工作證明或信用評分，無就拜拜；但亦有部分經紀表示會「記錄在案」。果然呢個「記錄在案」係有用嘅，開始有一兩個盤成功預約睇到。
透過呢個經驗，400歲人瑞就集中火力喺「真人」呢個重點度，有一次更把心一橫衝入地產舖以真人真身親自問盤。呢個舉動當然嚇窒入面正在工作嘅地產經紀，因為人哋通常只會接受預約。400歲人瑞咁樣衝入去問盤，人哋只係會派個職員叫你寫低電話同電郵地址，有盤就會通知你咁咁咁⋯⋯。400歲人瑞之後亦再無咁衝動咁衝入地產舖，繼續以電話形式預約睇盤，發覺呢個情況比較實際，同時可鍛練英語會話與聽力（辛苦了電話嘅另一邊）。
就喺Airbnb一個月住宿期屆滿之前兩三日，皇天不負有心人，400歲人瑞終於搵到啱心水嘅租盤！其實都好講緣份，呢個租盤嘅地理位置本來唔係喺400歲人瑞嘅視線範圍，係有個經紀回覆，話400歲人瑞本來預約睇嗰個租盤已俾人租咗，問我有冇興趣睇另一個盤。400歲人瑞心諗咪試下囉，點知400歲人瑞一睇就覺得ok喎！隨即立即同經紀確定落實租呢個盤就成事。
人瑞透過今次經驗，想同大家分享嘅係，初來到埗如果發覺搵唔到心水租盤就要靈活轉換策略，漁翁撒網等多啲經紀知道有你呢個租客更重要。肯做嘅經紀知道你有條件預繳12個月租金，都願意幫手。當然唔肯做嘅經紀亦有大把，點解呢？喺英國租樓，租客係唔駛俾佣金俾經紀嘅，佢哋係會向業主收佣。所以設身處地諗，租客其實唔係經紀嘅「客人」，只係經紀用嚟賺取業主佣金嘅「工具」，不難理解為何呢度有啲經紀對租客嘅態度，無香港啲經紀咁殷勤。
搵唔到樓租對剛剛到埗嘅人嚟講真係好沮喪，但千祈唔好氣餒，一定要努力搵才會搵到，當然要為情況諗定後備方案。
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請往Facebook專頁：https://www.facebook.com/thames400
