爆一爆｜揸住滙豐 欲斷難斷（Louise）

滙控（0005.HK）股價自宣佈派特別息兼豪擲二百億回購，股價曾彈上去70元，有些退休人士成日問：「 幾時賣得滙豐呢？」

下載Yahoo財經APP

美股外幣即時報價 多國新聞任睇

「紅底股」滙豐係集體回憶

呢隻香港人嘅「老股」，過去十幾年攬住佢驚濤駭浪。經歷$28世紀供股、疫情下又冇息派、被美國佬罰錢罰到窮、孟晚舟事件又激嬲阿爺.....股價沉咗十幾年終於叫有些少起色。

先利申，小妹去年聖誕節前平均$58入咗批貨，諗住賺餐團年飯，但見走勢唔錯就收埋今次嘅特別股息，見除淨前已出手回購股價托得住，咁就陸續在68、69元左右出貨，我唔貪心，鎖定利潤就算。

香港唔少家族基金，每年嘅家族大會就係要對所持滙豐股票，决議「以股代息」或是收現金股息。 (SOPA Images via Getty Images)

當然身邊亦有唔少滙豐擁躉，大大聲謂：「一於同佢共存亡呀！」 ，佢哋可能仲懷念住滙豐$100呢啲水位。 除咗小股民對滙豐欲斷難斷，香港唔少家族基金，每年嘅家族大會就係要對所持滙豐股票，决議「以股代息」或是收現金股息，有啲退休基金對滙豐亦好掙扎，試問市場有邊隻股票一年派四次息呢？當然最能夠「斷捨離」 就係自身難保嘅平保（2318.HK），多得匯豐出手回購托住個股價， 開條路俾佢出貨，大家好來好去。

始終滙豐同香港人係有啲情義結，早前同佢銀行banker打波，認識了一對退休廠家夫婦，二人穿起件HSBC Private Bank T-shirt，一睇就知係滙豐長情客仔，與banker朋友一見如故做埋波友，所以大笨象呢家百年老店，勝在有客底。

「風水米」棟咗係滙豐總行已有九年，當年滙豐股價都有六、七十蚊，中間跌過至三十幾蚊，如揸到今日收埋息算係「保本」。

滙豐「風水米」只係保本？

咁又係時候同滙豐粒「風水米」計下數，所謂「風水佬呃你十年八年」，粒風水米棟咗係滙豐總行已有九年，當年滙豐股價都有六、七十蚊，中間跌過至三十幾蚊，如揸到今日收埋息算係「保本」。

幫滙豐佈此風水陣的龍景銓師傅，當年喜歡坐「鏞記」近樓梯的一個風水位，但步入龍年，龍師傅也變陣，改坐係鏞記嘅龍鳳大禮堂的一張枱。嗱！風水佬都睇位變陣，回望過去無意思，睇位食糊先為上策。