【移民英國】英國租車自駕攻略 停車加油要「自助」
移居英國後想玩本地遊,又或到較遠地區探親友,方便之選係租車自駕,英國租車有乜選擇?停車入油又有乜嘢要注意。
美股、外匯、加密貨幣免費即時報價,自選投資組合獲取相關新聞提示。
既要有牌亦要有卡
英國最受歡迎的租車公司都係具規模跨國企業,Avis在香港都有據點,賣點係提供長短租約,不設提前還車罰款。Hertz賣點除了取車點多,登記成為會員更有折扣優惠,取車兩日前可免費取消訂單。Sixt賣點係租車套餐選擇多,既可以日租,亦可以選擇週租及月租,甚至可提供長達三個月租車選擇。Europcar賣點係會員有折扣優惠,日租更平至£19,並提供一至三個月長租套餐。
租車流程與一般旅行租車大同小異,到租車公司網站填預訂表格,按租車用途及人數揀車,再選擇預繳費用或取車時付款,並選擇導航、嬰兒座椅、升級保險等附加選項。
要成功租車,最基本係有車牌,持香港車牌頭一年可以在英國揸車,不過最好申請將香港牌轉換成英國牌。租車時亦耍提交從DVLA網站列印的駕駛者資料紀錄,並提供身份證明文件如護照、身份證等及地址證明。要留意部分租車公司如Hertz設有25歲年齡門檻,未滿25歲租車人士或要支付附加費。
除了車牌,租車另一必備係信用卡。雖然租車公司大都接受信用卡或Debit Card支付,由於唔少租車公司會預扣保證金,所以用信用卡會較方便,不過只要Debit Card持有人係租車者,Debit Card由英國銀行發行就問題不大。
泊車或要輸入車牌
在日本租車自駕駛不時都要駛上收費公路,為方便有時會租埋自動繳費卡,到還車時先一次過計算「買路錢」。英國租車自駕就毋須太擔心密密支付「買路錢」,大部分英國高速公路(Motorway)都是免費通行,收費公路主要有M6 Toll及M25 Dartford隧道,亦有部分大橋需要收費。高速公路一般速度上限為70 MPH,接近大城市路段則會按車輛流量收緊速度上限,因此要留心顯示板的相關資訊。由於影快相容許值按「速度上限x0.1+2MPH」計算,所以當高速公路車輛流量唔太多時,一般都會以接近80MPH速度駕駛。
揸車少不免要停車及入油,英國停車場新舊程度有頗大落差。有停車場仍採用入銀仔收費模式,即係睇時段收費入銀再拎停車飛。亦有較新型可用信用卡支付的收費機,部分收費機會要求輸入車牌資料並輸入預計拎車時間,所以付費時最好對停車時間有一個預算。部分市郊旅館設有收費停車場,泊好車後亦要在收費機入錢買一張全日泊車飛放在檔風玻璃前便可。市區旅館有時會與鄰近停車場合作,住客在停車場泊好車後可以拎停車票到旅館登記,就可以獲得減免停車費。
至於入油,主要採用自助方式,落車揀好燃油種類(如95號無鉛汽油),自己拎油槍加油,當加滿後放回油槍,就到油站便利店講出入油機號碼付款。假如沒有便利店,就直接在入油機用信用卡支付。
伸延閱讀: