雅虎香港財經 金缸經｜日本結束負利率 好壞睇未來半年
一段婚姻17周年，稱為「玫瑰婚」，用來形容日本同僵化利率都好貼切，因為呢段長達17年「有刺」嘅關係，隨住2024年3月19日，日本央行宣佈加息10點子，利率由-0.1%上調為0.0%至0.1%，僵化關係終告結束。大家最關心嘅，是同負利率「離婚」後，日本未來條路會點。日本經濟曾被形容為「失落三十年」，對旅客梗係爽皮，過去三十年日本物價差唔多，隨住已發展國家同城市物價持續上升，而日本產品質量不斷提升同時，我地呢三十年一直用差唔多價錢購物，真是爽爆，所以日本成為好多香港人第二故鄉。不過日本人就慘爆，例如供樓三十年，但層樓市值無乜郁過。如果只係本土生活，重可以勉強話只是情感受損，不過若計劃移民至其他已發展國家或城市，人哋通脹自己卻通縮，有樓都無得受惠。因此，2022年3月美國進入加息周期，為日本擺脫長期通縮帶來契機。由於日本繼續維持利息不變，令日圓兌美元貶值，從2022年2月底1美元兌115日圓，時至今日可換超過151日圓，兩年嚟隻円貶值近兩成四。而期內日本物價顯著上揚，CPI由2022年2月嘅0.5%，至2023年1月和2月分別為4.0%和4.3%，之後通脹先回順啲，今年2月為2.2%。基本上已發展國家和城市的健康CPI水平介乎2.0%至3.0%之間，日本於2014年4月至2015年3月曾處於一年健康水平。事隔七年後再次出現，所以日本央行對利率調控要非常審慎，稍一不慎惟恐又回到長年通縮慘況。之前負利率，暗示國民銀行存款不但無利息，更要「倒貼」給銀行，無非希望國民有錢就拎去使唔好擺銀行，能夠刺激消費。如今結束負利率令國民在銀行存款意欲增加，消費模式可能又會唔同，相信未來半年CPI走勢非常關鍵，如果又落到2.0%以下，日本經濟前景再度變得不樂觀，對於現時已直接買入日股或透過基金持有日股的投資者，及早準備退場策略為佳。
金缸經
註：專欄作家言論不代表本網立場
