雅虎香港財經 CFO財報解密│Tesla AI概念投資邏輯變化（Benny）
最近有報道指Elon Musk要求Nvidia（NVDA）將一批原本由Tesla預訂嘅芯片，轉運去Elon Musk私人AI公司xAi用。呢件事曝光後Elon Musk即刻喺X個人帳號解釋：因為Tesla數據中心未ready，佢唔想呢批芯片封塵所以決定畀xAi 用住先。
美股外幣即時報價 多國新聞任睇
xAi唔關Tesla其他股東事
聽落感覺合理：佢都係有效運用公司資源，唔想嘥時間盡快訓練佢嘅AI 模型。但細心啲諗：Tesla係一間上市公司，除咗Elon Musk，仲有好多其他機構投資者股東以及無數嘅散戶股東。而xAi係一間私人公司，主要由Elon Musk 持股，所以兩間公司喺股東基礎、內部資源上都係完全互相獨立嘅公司。
咁有效運用緊嘅係邊間公司嘅資源？盡快訓練嘅又係邊間公司嘅AI呢？ 又如果係xAi嘅AI訓練得快啲，Elon Musk會開心，但根本唔關Tesla嘅其他股東事。
上市公司控股股東、CEO唔係絕對唔可以有私人公司業務同上市公司業務重疊。例如Tesla同xAi都同時發展緊AI，兩間公司有competing business。但當兩間公司有competing business 嘅時候，喺呢兩間公司都有重大利益嘅Elon Musk，就應該避嫌唔參與涉及兩間公司competing business 嘅決策。例如今次嘅芯片事件，因為佢本身有利益衝突，佢應該將點樣處置呢批芯片嘅方案交俾其他高管決定。
旗下公司衝突 大股東應避嫌
因為市場、投資者畀Tesla的估值大部份唔係因為佢係一間電動車車廠，而係一間AI公司。如果Elon Musk毫不避嫌、積極參與兩間公司嘅AI相關業務決策，就會好容易俾市場垢病佢係唔係厚此薄彼，幫咗自己私人公司AI先，而要Tesla Autonomous AI等等？咁就算佢呢啲行為冇即時對Tesla業務有影響，喺某啲股東心目中可能已經打咗估值上嘅折扣。
當然好多人都會諗冇Elon Musk嘅帶領根本唔會有今日嘅Tesla，而且佢喺Tesla度都有重大嘅利益持分，佢唔會搞衰Tesla，所以風險未必咁大。呢個唔係一個非黑即白嘅問題，冇絕對啱與錯答案，但係從呢件事上反映咗我哋對Tesla嘅投資邏輯可能要作一個調整。
因為以前喺未有xAi前，你買Tesla 股份係買緊Elon Musk 喺Tesla發展AI嘅憧憬，但而家就變成Elon Musk同時喺Tesla同xAi發展AI，但你買Tesla股份係唔會享受到xAi發展AI嘅紅利。但除咗自動駕駛呢部份之外，你又唔知佢有幾多其他AI業務會擺喺Tesla度，就正如佢喺早前嘅季度業績會都只係保證自動駕駛會喺Tesla度發展，但係就已經冇再提其他AI嘅業務。
即係最簡單嘅一句：就係你買Tesla嘅股份已經唔能夠完全鎖住Elon Musk發展無限可能嘅AI紅利，因為佢自己私人都發展緊AI，呢個係我哋最基本要搞清楚唔可以混淆嘅地方。
Benny Yam
執業會計師
本欄隔周三刊出
