雅虎香港財經 爆一爆｜隔山買牛遇租霸 慘過「濕水鼻屎」（Louise）
近排日圓大瀉，除了到日本豪使豪買，又有人講起買日本樓，小妹即時反應：「隔山買牛，千祈咪，仆直嘅多。」以下是小妹自爆隔山買牛之血淚實况，預咗被網民揶揄，但我心理質素強，唔怕有碗話碗有碟話碟， 與Yahoo 讀者分享當發洩。
美股外幣即時報價 多國新聞任睇
落水買倫敦樓遇上「才俊租霸」
小妹三年前買入倫敦Zone 2 Battersea 個570呎一房單位，當時身邊的姊妹人人都買番間英國樓，加上香港「社會環境」急劇變化，一股作氣透過香港的經紀買咗呢個單位，當時英國還有 Stamp Duty Holiday，2021年3月31日前成交就慳番十幾廿萬（港元）厘印費 。
小妹有位做地產版舊同事在倫敦，義務幫小妹收樓兼搵租客，第一年租金有1700 鎊，第二年1900鎊，到第三年小妹唔好意思麻煩位舊同事，於是揾個港人letting agent，管理費為租金8%，去年11月搵到一名非洲裔英國人，做I.T. 嘅，以為係年青才俊，租金加至2300鎊。
點知第二個月已開始遲交租，要月月「催帳」，一時話入咗醫院，一時話銀行戶口被凍結，上月中到期交租，又話身在美國侯斯頓出席喪禮過唔到數，聽到呢啲故仔都知凶多吉少。唉！隔山買牛，想睇下隻牛都唔係咁容易，於是letting agent 就突擊去搜查下層樓，發現住客並非租客本人，只係佢嘅朋友，得悉後仲淆底，心想呢條非洲裔嘅英國仔好可能分租俾呢個無credit嘅朋友，今鋪認真「大檸樂」了。
小妹做業主首度遇租霸，有被欺凌嘅感覺，情緒難免低落，於是四出搵法律界、地產界朋友傾訴，喺英國原來收番層樓要租客欠租兩個月先可以搵律師出個Court Order，使費3000鎊，雖是啞子吃黃蓮，已速叫letting agent 擸起衫袖做嘢「郁」佢，等佢唔好以為老娘「好恰」。即使小妹相信英國乃是法治國家，不過法律保護租客多過業主，今鋪都係要交學費學野啦，學下喺英國點樣循法律途徑踢走呢啲租霸。
揸三個日本物業租金歸零
隔山買牛其實唔係咁過癮，有朋友手幾年前見日圓低水，買入三個日本物業，家陣全數冇出租，只係俾家人朋友用來渡假，當時佢都係以為日圓低水，幾廿萬買番間物業過癮下。
上週飲茶同佢傾開，佢都話：「唔好揸日本樓，好難甩手，我俾間屋朋友旅行住，貪有人睇下間屋咋。」近排有個移民去英國第三年嘅舊同事，想在當地置業希望將來拿到身份後返香港，靠層樓收租養老，小妹遂把遭遇跟她分享，叮囑她三思而後行。
粗俗些講句，揸住層英國樓，在息口高企下捱貴息，呢條租霸就好似「濕水鼻屎」咁，好想揈甩佢呀！
