大茶飯│小米漁人得利（青冰）

小米在競爭激烈的手機市場，應該不存在壟斷。

阿里巴巴（9988）旗下的螞蟻集團被監管機會約談，並要整改，觸發昨天科技巨頭再急插，騰訊（700）、阿里巴巴及美團（3690）齊跌7%，小米（1810）創完新高後單日轉向，跌4%，早前炒到飛天的京東健康（6618），因血統上都算係「壟斷」子孫們，一樣捱沽跌8%，呢五隻股加埋，成交近800億元，佔全日成交41%，可見沽壓之勁。

併購也要政治智慧

巨頭被撲殺，基金們應該走避不及，年尾都要嘔返一截出來，不過以整年來計，除了阿里巴巴只升1%外，其他都仲係升爆廠，而當中最好表現的，算係同壟斷無乜關連的小米，末季至今累升52%，全年升1.9倍，真係最後直路先衝上來，相對於幾位師兄弟在今月跌到一仆一碌，唔排除資金已由其他股換馬至小米。在競爭激烈的手機市場，應該不存在壟斷，再者，比起ATMJ，小米尚算專注，無殺價進入其他行業，觸動唔到中央的神經，手下留情的機會亦高啲。

小米月頭批股及發換股債，集資逾300億元，批股價係23.7元，換股債係零息，並以溢價105.25%發行，換股價係36.74元，以當日個價仲係24蚊來看，牌面上持有人係相當蝕底。不過幾星期過去後，大家可能會發現，當日接批股的人真發，以昨天高位33.75元計，咁就執十蚊了，零息換股債又如何呢，105.25元買入，昨天的價係122蚊，都有16%，真係飲得杯落，一個唔覺意升穿換股價，之後就啖啖肉。

早前青冰都分析過，其實小米並不太缺錢，手頭現金300億元，再加集資得來的300億元，即係有600億元子彈去發展或併購，但現時這個環境，每個新動作都需具有政治智慧，動搖到民生小企業命脈的收購及新發展，應可免則免，但拎住600億遲遲又唔出手，亦難向投資者交代。執筆之時見到小米新品將有發佈會，雷軍會亮相並作講話，究竟股價係升穿36.74元，還是隊落16.74元，就睇雷軍有冇從馬雲身上學到嘢喇。

青冰

http://www.fb.com/chingbing888

本欄逢周二刊出