雅虎香港財經 操盤手札記│環球大選年 龍騰飛躍添變數（割柑人）
龍年開局唔錯！上周三係年初五，甲辰龍年首個交易日，港股一如過往4個龍年（1976年、1988年、2000年、2012年）紅盤高收，今趟升0.8%，初六再升0.4%，初七更升2.5%，連升3日，累升3.8%；不過，喺北水過年截流下，成交分別只得571億元、470億元、707億元，相對上年過年北水截流期間平均每日成交1,040億元，差一大闕。過去4個龍年，港股開局高收，全年計收局亦高收，今趟有無「紅盤效應」，拭目以待！
美股外幣即時報價 多國新聞任睇
恒指有望扭轉兔年頽勢
投資者趁今日內地股市復市、北水復流前搶先入市，睇走勢圖，恒指1月下旬以嚟低位橫行整固，正在挑戰橫行區頂部同上年8月以嚟嘅下降軌16300水平，上周五收16339，如果確認突破，勢將挑戰過去半年嘅阻力位100天線，現處16800水平。若能升穿100天線，有望扭轉兔年大跌28.5%嘅頽勢，再展升浪，龍騰飛躍，先行再戰1月頭高位17100水平，而1月下旬以嚟嘅上升軌15700水平料有支持。
涉大國角力 港企亦中槍
根據恒生指數公司嘅數據，龍年係唯一全部（有紀錄嘅過去4次龍年）紅盤高收兼全年高收嘅生肖；不過，今個龍年有個變數——環球大選！環球大選涉及大國角力，除咗美國總統選舉11月舉行，中美鬥法愈演愈烈外；俄羅斯總統選舉3月舉行、歐洲議會選舉6月舉行，近日亦見出招。據自由歐洲電台2月10日披露，歐盟正準備制裁幫助俄羅斯入侵烏克蘭嘅21間軍事同科技公司，包括3間中國大陸公司同1間香港公司，將於2月24日俄烏戰爭兩周年宣布。
歐盟對俄羅斯算帳，中港公司亦中槍，風頭火勢，本港上市公司賣俄資產避風頭唔奇；但若賣俄資產避歐美制裁風險只係表面，背後另一回事，咁就要小心！筆者講緊嘅case，係凱升控股（0102.HK）同母公司LET Group（1383，前稱太陽城，創辦人係賭場大亨「洗米華」周焯華）。初五復市當日，證監會勒令該兩公司停牌，事緣該兩公司1月10日公告翌日起短暫停牌待發內幕消息，而證監會1月29日得悉LET同凱升擬以1.16億美元賣俄資產，之後恐怕無法符合《上市規則》第13.24條「須有足夠的業務運作並且擁有相當價值的資產支持其營運，其證券才得以繼續上市。」因此介入調查。
擬賣俄資產 兩公司惹證監關注
LET同凱升停牌背後，似乎唔係表面原因賣產避險咁簡單。翻查資料，周焯華捲入不法開賭案喺澳門受查後，該兩公司由原董事盧衍溢接任主席。LET 1月15日公布，公司全體獨立非執行董事，因反對屬於該兩公司附屬公司嘅東雋出售俄羅斯資產而辭任，公司只餘盧衍溢一名執行董事；凱升同時公布，公司兩名執行董事辭任，以及全體獨立非執行董事辭任，公司只餘盧衍溢一名執行董事。
睇LET同凱升股價走勢，上年9月下旬起明顯遭到拋售，期內凱升並無特別消息傳出，LET則不斷賣資產，包括東陽新光100%股權、信博亞州（香港）100%股權、日本北海道物業（交易告吹但殺訂），以及是次引起證監會關注嘅俄羅斯G1 Entertainment（擁有俄羅斯政府授予無限期博彩牌照，持有3幅位於俄羅斯遠東濱海地區綜合娛樂區土地）。上市公司短時間內頻賣資產，加上董事集體跳船，呢類股票，不宜沾手！
本欄隔周一刊出
