雅虎香港財經 操盤手札記│憧憬停加息 反見「真加息」（割柑人）
市場憧憬美國聯儲局下月議息會議將暫停加息；不過，隨着銀行業危機蔓延，民眾對銀行體系信任下降、對金融市場風險擔憂上升，商業銀行面臨存款流失，需要提高利率以吸引存戶存款，反映加息效果逐步顯現，「真加息」開始！相對銀行體系存款流失同流動性壓力，銀行業危機帶嚟嘅未來整體資金成本上升，先係更為根本嘅問題！蘋果（美：AAPL）Apple Card高息儲蓄帳戶就係一例，銀行存款開始流失並轉向貨幣市場基金，意味整體資金成本開始上升。
美股外幣即時報價 多國新聞任睇
唔止美國，歐洲亦有類似情況，香港都見銀行加息爭奪存款、資金成本上升。踏入5月，本港銀行爆發搶錢戰，最初集中喺短期存款，近兩周蔓延至6個月期存款；不過，整體嚟講，以3個月期存款爭奪最激烈，近兩周已有15間銀行上調3個月期存息，近日更已重上4厘。另一方面，隨着美國月初再度加息，本港銀行都上調貸款最優惠利率（Prime rate），本港銀行同業拆息（HIBOR）亦抽高。
後加息時代 非意味復甦
值得注意嘅係，上周三開始，港元拆息全線升破4厘，當日下午5時許，隔日拆息（明日借錢、後日還錢）叫價更高見5.75厘，2時許則有銀行以5.375厘成交。短息爆升並不尋常，尤其美息料已見頂。傳聞係有兩間發鈔行問同業拆借大額短期港元，因有基金公司打算搬總部去新加坡，要轉錢去一間星資銀行，由於滙款需時，兩間發鈔行要拆借短錢，更撻着同業panic mode狂掃短錢，令港滙緊張。
上述事件是耶非耶，要問兩間發鈔行同金管局至知。姑勿論係點，如果一間基金公司搬竇就令港元拆息大幅波動，反映市場信心相當脆弱，尤其現時銀行體系結餘已由上年5月嘅3,380億元跌至445億元，市場擔心流動性短缺，拆借取態更為審慎。本港銀行存貸息率、同業拆息都上升，顯示資金成本上升。利率上行會對經濟帶嚟下行壓力，換言之，「後加息」時代並非意味經濟會好快復甦。
美息料見頂 利好科技股
講返港股，受中國經濟數據差過預期影響，人民幣跌穿七算，市場觀望政策力度，港股繼續橫行整固，昨收19560，跌2.1%。恒指近兩個月喺19500至20800區間上落，現時阻力位為1月尾以嚟延伸嘅下降軌20180水平，支持位為橫行區底19500水平。要留意係，恒指保歷加通道收窄至4.5%，係上年1月以嚟最窄，通道收窄屬上落市尾聲、醞釀單邊市之兆。會爆上定爆落？要睇藍籌科技股，畢竟科技股佔恒指比重達25%（6月5日季檢變動生效後更佔27%）。
美國息口料已見頂，市場對利率敏感嘅新經濟股情緒有所修復，美國科技股首季業績向好，香港上市嘅科技股亦正值首季業績期，藍籌ATMJB中，「J」京東（9618）上周四打頭陣，前日輪到「B」百度（9888），昨日到「T」騰訊（700），明日到「A」阿里巴巴（9988），「M」美團（3690）則於下周四派成績表。觀乎京東、百度首季扭虧為盈好過預期，騰訊經調整盈利按年增27%亦符合預期，不妨留意相關股份短線博反彈機會。騰訊上周起已見北水密密吸納，現時季績過關，若股價呈震倉，反可伺機小注。
割柑人
www.fb.com/hkstockpicker
本欄逢周四刊出
