金融花生│2024港股睇中睇美睇中東（言平）

投資者等到頸都長，終於可以告別2023年喇，對於港股捧場客嚟講，2023年絕對係悲情嘅一年，唔少朋友單單只係買幾隻大藍籌股，副身家就縮咗水四分之一。 (NurPhoto via Getty Images)

投資者等到頸都長，終於可以告別2023年喇，對於港股捧場客嚟講，2023年絕對係悲情嘅一年，唔少朋友單單只係買幾隻大藍籌股，副身家就縮咗水四分之一，原因係過去一年內地及香港經濟同樣經歷疫情後持續喺低谷徘徊，同早前所預期疫後「V形反彈」完全不相符；另外，由於中、美關係進一步轉為緊張，資金持續由香港股市流走，令到香港喪失咗好多世界級領先地位，包括亞洲新股集資重鎮、外資利用滬股通及深股通進入內地股市主要渠道，所以，港股去年表現喺成熟市場中又（係「又」喇）處於包尾。由於港股令到好多港股大好友心碎，好多投資者都紛紛轉投美股既懷抱，令到走勢上出現「西升東降」。雖然過去一年港股表現非常不濟，不過，港人應該發揮打不死精神，愈係逆境就要愈加把勁，咁先有機會等到市況逆轉時全面反攻。

下載Yahoo財經APP

美股外幣即時報價 多國新聞任睇

港股會延續2023年嘅悲情？

究竟2024年，港股投資市場將會係點樣一年呢？會延續2023年嘅悲情？抑或會迎嚟否極泰來一刻呢？當然無人知，能知三日事，富貴萬千年啦，但綜合市場上各界對2024年預測，睇好睇淡港股後市因素大致概括如下。

其中，睇好因素包括：

1) 內地經濟增長速度有機會加快

2) 美國聯儲局有機會喺2024年年中減息

3) 美國大選年一般都會有刺激經濟措施，以及

4) 港股估值已非常低，一旦股市回升港股將會明顯受惠。

至於睇淡原因則包括：

1) 內地樓市問題仍未有解決的苗頭

2) 外資仍然對中國市場抱有戒心

以及3) 中、美關係可能喺全球多國大選年期間再度緊張，尤其年頭台灣大選同年尾美國大選。

因此，雖然港股整體估值已跌至非常低水平，尤其歷史市盈率得返10.2倍，已經非常貼近2008年金融海嘯時歷史低谷8倍。

恒指上番20000點有價講

雖然2024年港股未必可以係低估值情況下大放異彩，尤其係啲大藍籌科技股隻隻都已經跌到五癆七傷，而且好似騰訊（0700.HK）、美團（3690.HK）、京東（9618.HK）又甚至阿里（9988.HK），背後班大股東個個都睇住個價嚟沽貨，只要股價稍有好轉，沽盤就隨即殺到，令到恒指要靠呢一堆大藍籌食糊嘅話，真係唔使旨意，恒指今年升到上去23000點，已經還得神落，如果要見到30000點以上，又甚至要追返美股升勢，就更加唔使諗住。所以，恒指2024年喺16000點至20200點之間徘徊，即相等於2023年預測市盈率約8倍至10.1倍，似乎重有啲價講。而港股投資者喺2024年仍然可以用「炒股唔炒市」呢個策略為主打招式，認清啲資金會流去邊個板塊，跟住啲大戶去搵食，好過「守株待兔」式去等恒指向上突破20000點。

騰訊（0700.HK）、美團（3690.HK）、京東（9618.HK）又甚至阿里（9988.HK），背後班大股東個個都睇住個價嚟沽貨，只要股價稍有好轉，沽盤就隨即殺到。 (VCG via Getty Images)

至於投資者可以揀啲乜嘢板塊呢？其實特區政府已經畀哂貼士，事關特區政府官員已經日以繼夜夜以繼日去海外市場搵有興趣投資港股嘅海外投資者，並終於有啲反應。不過海外投資者對港股認知不高，難以即時拎大筆資金去掃港股，所以，喺港股走勢未轉強之前，海外投資者亦唔會貿然丟大量資金落海，推返起港股。不過，今次特區政府去得探訪Sell香港市場嘅國家，都係集中以中東為主，尤其係沙地阿拉伯，無他嘅，主要咪係佢哋有錢，就算油價雖然近期回落咗唔少，但仍然賣到每桶72美元，畀佢哋每桶開採成本7美金樓下，每日24小時開住個油泵簡直同開住個印鈔機一樣。所以，沙特亞拉伯肯定會喺特區政府長期使用人釘人戰術「嘜住」嘅目標。

如果全球繼續進行減碳及減排，沙地日後每日賣少一半油，即係收入同啲地下原油價值會唔見咗一大截。 (traffic_analyzer via Getty Images)

吼中東資金 搭順風車

沙地阿拉伯地面收大把美金，而地下又有大把黑金，同埋現時全球對石油需求逐步回復，理論上佢哋無乜特別理由要應酬特區政府，將啲錢投入一個完全唔熟識嘅市場。但諗深一層，如果全球繼續進行減碳及減排，佢哋日後每日賣少一半油，即係收入同啲地下原油價值會唔見咗一大截，所以，唔難預測沙地阿拉伯未來一定要搵一啲同能源事業無太大關係嘅行業嚟做投資。尤其舊年已有多個中東基金開始投資喺香港掛牌嘅內地電動車股份，雖然啲股份表現只係麻麻，不過呢批中東資金相信只係先頭部隊，未來有更多中東資金入場一啲都唔出奇。所以，與其睇啲無乜賣點下嘅傳統股份，不如睇吓中東佬啲錢流去邊，搭個順風車啦。

言平

本欄隔周四刊出